سوال: کیا حضرت خضرعلیہ السلام نبی تھے اور فی الوقت وہ حیات ہیں یا انتقال فرما گئے ہیں؟ مزید اس بات کی بھی وضاحت فرما دیں کہ کیا ان کی حیات و وفات میں علماء کا اختلاف ہے، اگر ہے تو راجح قول کیا ہے اور کیا بخاری شریف میں ان کے حوالے سے ایسی کوئی روایت موجود ہے کہ انہوں نے آب حیات پیا ہے؟

جواب: حضرت خضر علیہ السلام کى شخصیت سے متعلق جو سوالات پوچھے گئے ہیں، قرآن کریم میں ان کے متعلق مذکور قصے میں ان سوالات کے جوابات کى کوئى وضاحت موجود نہیں ہے، بلکہ قرآن کریم میں تو ان کا نام بھى مذکور نہیں ہے، ان کے تعارف میں صرف یہ فرمایا گیا ہے: "ہمارے بندوں میں سے ایک بندہ جس کو ہم نے اپنى خصوصى رحمت سے نوازا تھا اور خاص اپنى طرف سے ایک علم سکھایا تھا" (سورۃ الکہف: 65)۔ جس سے معلوم ہوتا ہے کہ اس دلچسپ قصے کو بیان فرما کر جو قرآنى ہدایات مقصود ہیں، وہ اصل میں پوچھنے کے سوالات ہیں، بہر کیف! احادیث مبارکہ میں ان کے نام کى تعیین اور اس کى وجہ تسمیہ وغیرہ اور اس واقعہ کى بہت سى جزوى تفصیلات بیان فرمائى گئى ہیں، نیز محدثین و مفسرین نے ان کے نبى یا ولی ہونے اور ان کے اب تک بقید حیات ہونے سے متعلق جو تفصیلات بیان فرمائی ہیں، ان کا خلاصہ ذیل میں بیان کیا جاتا ہے:
1) قرآن کریم کى سورہ کہف میں حضرت موسى علیہ السلام کے ساتھ جس شخصیت کا قصہ بیان کیا گیا ہے، صحیح احادیث مبارکہ میں ہے کہ ان کا نام خضر (علیہ السلام) ہے، خِضر کے معنى ہیں: سبزہ زار، سبز مقام۔
حضرت ابو ہریرہ رضی اللہ عنہ سے مروى ہے کہ آنحضرت صلى اللہ علیہ وسلم نے ارشاد فرمایا: "خضر کو خضر اس لیے کہا جاتا ہے کہ وہ (حضرت خضر علیہ السلام) ایک مرتبہ خشک سفید زمین پر بیٹھے تھے تو جب وہ اس سے اٹھے تو وہ زمین یکایک سرسبز ہو کر لہلہانے لگى"۔ (صحیح بخارى: حدیث نمبر: 3402)
2) حضرت خضر علیہ السلام کے اللہ تعالى کے ولى يا نبى ہونے کے متعلق متقدمین اہل علم محدثین و مفسرین کے درمیان اختلاف پایا جاتا ہے، ان میں سے جمہور علماء کا موقف یہ کہ حضرت خضر علیہ السلام اللہ تعالى کے نبى تھے، جمہور علماء کے اس موقف کو حضرت مفتى محمد شفیع عثمانی صاحب نور اللہ مرقدہ نے اپنى تفسیر "معارف القرآن" جلد 5 ص 612 میں نقل فرمایا ہے: "قران کریم نے یہ بھی واضح نہیں کیا کہ خضر علیہ السلام کوئی پیغمبر تھے یا اولیاء اللہ میں سے کوئی فرد تھے لیکن جمہور علماء کے نزدیک ان کا نبی ہونا خود قرآن کریم میں ذکر کیے ہوئے واقعات سے ثابت ہے، کیونکہ خضر علیہ السلام سے اس سفر میں جتنے واقعات ثابت ہیں، ان میں سے بعض تو قطعی طور پر خلاف شرع ہیں اور حکمِ شریعت سے کوئی استثنی بجز وحی الہی کے ہو نہیں سکتا جو نبی اور پیغمبر ہی کے ساتھ مخصوص ہے، ولی کو بھی کشف یا الہام سے کچھ چیزیں معلوم ہو سکتی ہیں، مگر وہ کوئی حجت نہیں ہوتیں، ان کی بنا پر ظاہر شریعت کے کسی حکم کو بدلا نہیں جا سکتا، اس لیے یہ متعین ہو جاتا ہے کہ خضر علیہ السلام اللہ کے نبی اور پیغمبر تھے، ان کو بذریعہ وحی الہی بعض خاص احکام وہ دیے گئے تھے جو ظاہر ِشریعت کے خلاف تھے، انہوں نے جو کچھ کیا اس استثنائى حکم کے ماتحت کیا، خود ان کی طرف سے اس کا اظہار بھی قران کریم کے اس جملے میں ہو گیا (میں نے جو کچھ کیا اپنی طرف سے نہیں کیا، بلکہ امر ِالہی سے کیا ہے)۔
خلاصہ یہ ہے کہ جمہور امت کے نزدیک حضرت خضر علیہ السلام بھی ایک نبی اور پیغمبر ہیں، مگر ان کو کچھ تکوینی خدمتیں من جانب اللہ سپرد کی گئی تھیں، انہی کا علم دیا گیا تھا اور حضرت موسی علیہ السلام کو اس کی اطلاع نہ تھی، اسی لیے اس پر اعتراض کیا، تفسیر قرطبی، بحر محیط ابو حیان اور اکثر تفاسیر میں یہ مضمون بعنوانات مختلفہ مذکور ہے"۔
3) حضرت خضر علیہ السلام کى حیات سے متعلق بھى اہل علم کا اختلاف ہے، محدثین کے ایک طبقے کا موقف یہ کہ حضرت خضر علیہ السلام اب تک حیات نہیں ہیں، جبکہ جمہور علماء وصلحاء کا موقف یہ ہے کہ حضرت خضر علیہ السلام اب تک حیات ہیں، ذیل میں محققین اہل علم کے اہم اقتباسات نقل کیے جاتے ہیں:
حکیم الأمت حضرت مولانا اشرف على تھانوى نور اللہ مرقدہ نے "امداد الفتاوى" جلد 4 ص 541، مسائل شتى، طبع: مکتبہ دار العلوم کراچى، میں تحریر فرماتے ہیں: "حضرت خواجہ خضر علیہ السلام کا زندہ رہنا جناب سرور کائنات صلی اللہ علیہ وسلم کے بعد تک ثابت ہے، چنانچہ بعد وفات نبوی صلی اللہ علیہ وسلم صحابہ کے پاس تشریف لائے اور تعزیت فرمائی اور حضر ت ابوبکر صدیق و حضرت علی رضی اللہ عنہما نے فرمایا کہ یہ حضرت خضر علیہ السلام تھے۔ اور اب تک زندہ ہونے پر تمام اہلِ باطن و صلحاء کا اتفاق ہے اور ہمیشہ ایسے لوگوں سے ملاقات کرتے رہے اور کرتے ہیں۔۔۔ اور اکثر بزرگوں سے حکایات بمنزلۂ متواتر ان کی زندگی کے منقول و مشہور ہیں۔ فقط واللہ تعالی اعلم"۔
فقیہ الأمت حضرت مفتى محمود حسن گنگوہى نورہ اللہ مرقدہ "فتاوى محمودیہ" جلد 1 ص 442، طبع: ادارۃ الفاروق، کراچى میں تحریر فرماتے ہیں:"جمہور علماء کا مذہب یہ ہے کہ خضر علیہ الصلاة والسلام زندہ ہیں، ہاں بعض اس کے قائل ہیں کہ انتقال کر چکے ہیں۔۔۔۔ اور بعض روایات سے معلوم ہوتا ہے کہ حضور اکرم صلى اللہ علیہ وسلم کى وفات پر تعزیت کے لیے تشریف لائے اور صحابہؓ کے مجمع میں تعزیت کى ہے اور حضرت ابوبکر رضی اللہ عنہ نے فرمایا کہ یہ خضر علیہ السلام ہیں كذا في جمع الفوائد"۔
وأیضا: جلد 1 ص 445: "محدثین کرام عموماً حضرت خضر علیہ الصلاۃ والسلام کى حیات کے قائل نہیں، صوفیائے عظام قائل ہیں"۔
حضرت مفتی محمد شفیع عثمانی صاحب نور اللہ مرقدہ "معارف القرآن" جلد 5 ص 626 میں تحریر فرماتے ہیں: "حضرت خضر علیہ السلام کی موت و حیات سے ہمارا کوئی اعتقادی یا علمی مسئلہ متعلق نہیں ہے، اسی لیے قرآن و حدیث میں اس کے متعلق کوئی صراحت و وضاحت نہیں کى گئى ہے، اس لیے اس میں زیادہ بحث و تمحیص کى بھى ضرورت نہیں، نہ کسى ایک جانب کا یقین رکھنا ہمارے لیے ضرورى ہے"۔
3) حضرت خضر علیہ السلام کے آب حیات نوش فرمانے کا ذکر نہ تو قرآن کریم میں ہے اور نہ ہی کسی صحیح حدیث میں اور نہ ہى صحیح بخارى میں مذکور ہے۔ بعض تاریخی روایات میں ان کا ذکر ملتا ہے، لیکن وہ قابل اعتبار نہیں ہیں۔