سوال: السلام علیکم، مفتی صاحب ! میری عمر بیس سال ہے، میں سخت جنسی اضطراب کا شکار ہوں اور شادی کی شدید ضرورت محسوس کرتا ہوں، پہلے والدین کا کہنا تھا کہ کچھ کمانا شروع کرو، اب جب کہ میں نے کمانا شروع کر دیا ہے تو ان کا کہنا ہے کہ پہلے اپنی پڑھائی مکمل کرو، پھر پچیس چھبیس سال کی عمر تک تمہاری شادی کروا دیں گے، مجھے خوف ہے کہ کہیں جذبات کے ہاتھوں مغلوب ہو کر میں غلط راہ پر نہ چل پڑوں، براہ کرم میرے مسئلے کا حل تجویز فرمائیں؟

جواب:
مذکورہ حالات میں والدین کو چاہیے کہ جلد از جلد مناسب رشتہ دیکھ کر آپ کی شادی کروادیں، بصورت دیگر آپ سے کوئی گناہ سرزد ہونے کی صورت میں گناہ کا عذاب آپ کے ساتھ ساتھ والدین کو بھی ہوگا، اور جب تک شادی نہیں ہوجاتی، تب تک آپ مندرجہ ذیل باتوں پر عمل کرتے رہیں:
(1) نظروں کی حفاظت کریں۔
(2) نامحرم اور اجبنی عورتوں کے ساتھ اختلاط سے بچیں۔
(3) روزے رکھیں، کیونکہ روزہ رکھنے سے شہوت مغلوب ہوتی ہے۔
(4) ایسی غذائیں استعمال نہ کریں، جس سے شہوت میں اضافہ ہوتا ہو۔
(5) غلط ماحول اور خیالات سے بچنے کی حتی المقدور کوشش کریں، اپنے آپ کو مصروف رکھیں، حتی الامکان تنہائی سے احتراز کریں، اور جہاں تنہائی ناگزیر ہو، وہاں کم سے کم وقت گزارنے کی عادت اور ترتیب بنائیں۔
(6) کسی بزرگ سے بیعت کرنے یا تبلیغی جماعت میں کچھ وقت لگانے کی کوشش کریں اور اپنا اٹھنا بیٹھنا نیک لوگوں کے ساتھ رکھیں۔
امید ہے ان چیزوں پر عمل کرنے کی وجہ سے اللہ پاک آپ کی شیطان کے مکر و فریب سے حفاظت فرمائیں گے۔