سوال: تفسير ابن کثیر میں باب حمد میں ایک دعا (یارب لك الحمد كما ينبغي لجلال وجهك وعظيم سلطانك) لکھی ہوئی ہے، کیا اس دعا کو اپنی اولاد کو سکھانے کی غرض سے دسترخوان پر بٹھا کر کھانا کھانے کی دعا کے بعد تھوڑی دیر تک اس کو پڑھنا ٹھیک ہے؟

جواب: سوال میں ذکرکردہ روایت سند کے اعتبار سے ’’ضعیف‘‘ہے،البتہ چونکہ اس حدیث کا تعلق فضائل ِ اعمال سے ہے،لہذا اس حدیث کو ضعف کی صراحت کے ساتھ بیان کیا جاسکتا ہے نیز واضح رہے کہ اس دعا کے پڑھنے اور سیکھنے، سکھانے کا کوئی خاص وقت مقرر نہیں ہے، جس وقت چاہیں، پڑھ لیں اور بچوں کو بھی سکھائیں۔ اس حدیث کا ترجمہ،تخریج اور اسنادی حیثیت مندرجہ ذیل ہے:
ترجمہ:عبداللہ بن عمر رضی اللہ عنہما فرماتے ہیں کہ رسول اللہﷺنے ان سے بیان کیا کہ اللہ کے بندوں میں سے ایک بندے نے یوں کہا: «يا رب لك الحمد كما ينبغي لجلال وجهك ولعظيم سلطانك» ”اے میرے رب! میں تیری ایسی تعریف کرتا ہوں، جو تیری ذات کے جلال اور تیری سلطنت کی عظمت کے لائق ہے“، تو یہ کلمہ ان دونوں فرشتوں (یعنی کراما ً کاتبین) پر مشکل ہوا، اور وہ نہیں سمجھ سکے کہ اس کلمے کو کس طرح لکھیں، آخر وہ دونوں آسمان کی طرف چڑھے اور عرض کیا: اے ہمارے رب! تیرے بندے نے ایک ایسا کلمہ کہا ہے، جسے ہم نہیں جانتے کہ کیسے لکھیں؟ اللہ تعالیٰ نے فرمایا: میرے بندے نے کیا کہا؟ حالانکہ اس کے بندے نے جو کہا، اسے وہ خوب جانتا ہے، ان فرشتوں نے عرض کیا: تیرے بندے نے یہ کلمہ کہا ہے «يا رب لك الحمد كما ينبغي لجلال وجهك ولعظيم سلطانك»تب اللہ تعالیٰ نے فرمایا: اس کلمہ کو (ان ہی لفظوں کے ساتھ نامہ اعمال میں) اسی طرح لکھ دو، جس طرح میرے بندے نے کہا: یہاں تک کہ جب میرا بندہ مجھ سے ملے گا تو میں اس وقت اس کو اس کا بدلہ دوں گا“۔(سنن ابن ماجہ، حدیث نمبر: 3801)
تخریج الحدیث:
ا۔امام ابن ماجہ (م 273ھ) نے’’سنن ابن ماجہ‘‘(4/712،رقم الحديث:3801،ط:دارالرسالة العالمية)میں ذکرکیا ہے۔
۲۔ حافظ ابوبکر محمد بن جعفر الخرائطی (م327ھ)نے’’ فضيلة الشكر‘‘(36،رقم الحديث:10،ط:دارالفكر) میں ذکرکیا ہے۔
۳۔امام طبرانی (م360ھ)نے’’المجم الأوسط‘‘(9/101،رقم الحديث:9249،ط:دارالحرمين)،’’المعجم الکبیر‘‘(12/343،رقم الحديث:13297،ط:مكتبة ابن تيمية) میں ذکرکیا ہے۔
۴۔امام بیہقی (م458ھ)نے’’شعب الایمان‘‘(4/94،رقم الحديث:4387،ط:دارالكتب العلمية )میں ذکرکیا ہے۔
مذکورہ روایت کی اسنادی حیثیت:
علامہ منذری (م656ھ)نےفرمایا:اس روایت کی سند متصل ہے اس کے روات ثقہ ہیں ،البتہ اور’’صدقۃ بن بشیر‘‘کے بارے میں مجھے جرح یا تعدیل کا پتہ نہیں۔
علامہ بوصیری(م840 ھ)فرماتے ہیں :اس حدیث کی سند میں کلام ہے ،اس کی سند میں’’صدقۃ بن ابراہیم‘‘ کو علامہ ابن حبان (م354ھ)نے ثقات میں ذکرکیا ہے اور’’صدقۃ بن بشیر‘‘کے بارے میں معلوم نہیں کہ کسی نے ان کی جرح کی ہے یا تعدیل ،اور اس روایت کی سند میں باقی رجال ثقہ ہیں ۔(۲)