سوال: کیا کوئی ایسی حدیث موجود ہے جس میں یہ کہا گیا ہو کہ "جو شخص ستر ہزار مرتبہ لا إلہ إلا اللہ پڑھے تو اس کی مغفرت ہو جاتی ہے"؟ مولانا زکریا رحمہ اللہ نے فضائل ذکر میں اس کا تذکرہ کیا ہے۔

جواب: واضح رہے کہ ستر ہزار مرتبہ کلمہ طیبہ پڑھنے کی فضیلت کے متعلق کوئی صحیح حدیث موجود نہیں ہے، البتہ "مرقاۃ شرح مشکوٰۃ" میں شیخ محی الدین ابن عربی فرماتے ہیں کہ مجھے رسول خدا صلی اللہ علیہ وسلم کی یہ روایت پہنچی ہے کہ جو شخص ستر ہزار مرتبہ لا إلہ إلا اللہ پڑھے، تو اس کی مغفرت ہو جاتی ہے، اور جس کے لیے پڑھا جائے، اس کی مغفرت ہو جاتی ہے۔
پس ستر ہزار دفعہ کلمہ طیبہ کے پڑھنے کا ثبوت کسی صحیح حدیث سے تو نہیں ملتا، البتہ یہ بزرگوں کے مجرَّبات میں سے ہے، لہذا اگر کوئی شخص کسی خاص تعداد اور کسی خاص فضیلت کو بیان کیے بغیر اس کلمے کا کثرت سے ورد کرے، تو یقینا اس کے لیے باعث اجر و ثواب ہوگا، اور اگر مرحومین کے ایصال ثواب کیلئے پڑھا جائے، تو ان شاءاللہ ان کی مغفرت کا باعث ہوگا۔
اور جہاں تک فضائل اعمال کا تعلق ہے، تو اس میں بھی مولانا زکریا رحمہ اللہ نے فضائل ذکر میں شیخ ابو یزید قرطبی رحمہ اللہ کے حوالے سے یہ واقعہ ذکر کیا ہے، اس سلسلے میں کوئی حدیث ذکر نہیں کی ہے۔