سوال: السلام علیکم، مفتی صاحب ! آج کل جب کہ سعودی حکومت کی طرف سے عمرہ کرنے پر پابندی عائد ہے، تو کیا آج کل کوئی آفاقی شخص احرام باندھے بغیر وہاں جا سکتا ہے؟

جواب: فقہاء احناف کے نزدیک آفاقی اگر مکہ مکرمہ (حدود حرم) جائے، تو اس کے لیے میقات سے احرام کے ساتھ گزرنا ضروری ہے ورنہ دم لازم آئے گا۔
نیز موجودہ وبائی صورت حال میں بھی اصل حکم یہی ہے، لہذا جب تک سعودی حکومت کی طرف سے عمرہ کرنے پر پابندی ہے، تب تک حدود حرم نہ جائیں، لیکن اگر شدید مجبوری ہو اور حدود حرم جانا ضروری ہو، تو ایسی صورت میں چونکہ میقات سے اگر احرام باندھ کر جائیں، تب بھی انہیں پابندی کی وجہ عمرہ نہیں کرنے دیا جائے گا، اس سے احرام کی پابندیاں طویل ہونے کا خدشہ ہے، جس سے حرج لازم آئے گا، اس مخصوص صورت حال میں بعض مفتیان کرام نے امام شافعی رحمہ اللّٰہ کے قول پر عمل کرنے کی گنجائش دی ہے
کہ حدود حرم جانے کے لیے، اگر میقات سے بلا احرام تجاوز ہو، تو دم لازم نہیں آئے گا۔