سوال: السلام علیکم، مفتی صاحب ! موجودہ وائرس میں مصافحہ کرنا سنت ہے یا نہیں؟

جواب: زبانی سلام کرنا سنت ہے اور مصافحہ مستحب ہے، اس لیے اگر ہاتھ ملانے سے کسی کو تکلیف پہنچتی ہے تو اس وقت اس کو ترک کیا جاسکتا ہے، اسی وجہ سے ایسے حالات میں صرف سلام پر اکتفا کرنا چاہیے، کیونکہ شریعت ہمیں احتیاط کا حکم دیتی ہے.
حدیث شریف میں آتا ہے:
عَنْ عَمْرِو بْنِ الشَّرِیدِ عَنْ أَبِیہِ قَالَ قَدِمَ عَلَی النَّبِیِّ صَلَّی اللّٰہُ عَلَیْہِ وَسَلَّمَ رَجُلٌ مَجْذُومٌ مِنْ ثَقِیفٍ لِیُبَایِعَہُ فَأَتَیْتُ النَّبِیَّ صَلَّی اللّٰہُ عَلَیْہِ وَسَلَّمَ فَذَکَرْتُ ذٰلِکَ لَہُ فَقَالَ: ((اِئْتِہِ فَأَخْبِرْہُ أَنِّی قَدْ بَایَعْتُہُ فَلْیَرْجِعْ۔)) (مسند احمد: ج:32،ص: 218، حدیث نمبر: 19468)
ترجمہ:
حضرت شرید بن سوید ثقفی ‌رضی ‌اللہ ‌عنہ روایت کرتے ہیں کہ نبی کریم ‌صلی ‌اللہ ‌علیہ ‌وسلم کے پاس بنو ثقیف کا ایک کوڑھ زدہ آدمی آیا، تاکہ آپ ‌صلی ‌اللہ ‌علیہ ‌وسلم سے بیعت کرے، میں نبی کریم ‌صلی ‌اللہ ‌علیہ ‌ ‌وسلم کے پاس حاضر ہوا اور عرض کی کہ ایک جذام زدہ آدمی آپ کی بیعت کرنا چاہتا ہے، آپ نے فرمایا: تم اس کے پاس جاؤ اور اس سے کہو کہ میں نے اس کی بیعت قبول کرلی ہے، وہ وہیں سے واپس چلا جائے۔
محدثین کرام نے اس حدیث شریف کی تشریح میں لکھا ہے کہ آپ صلی اللہ علیہ وسلم نے امت کو ایسے موقع پر اسباب کے درجے میں احتیاط کا پہلو اختیار کرنے کا درس دینے کی خاطر اس آدمی سے ہاتھ ملانے کے بجائے زبانی بیعت پر اکتفاء کیا۔
لہذا کسی بھی متعدی اور وبائی امراض کے پھیلنے کا اندیشے ہو تو اس وقت حکومت ، ڈاکٹرز یا ماہرین کی طرف سے، جن احتیاطی تدابیر کا اعلان کیا جا رہا ہو، اگر وہ تدابیر شریعت کے خلاف نہ ہوں تو شرعی نقطہ نظر سے بھی ان کی پابندی کرنی چاہئے۔