سوال: اگر کوٸی بیوی خود طلاق کا مطالبہ کرے تو کیا لڑکے کے گھر والوں کو جو بیوی کے گھر والوں کی طرف سے تحائف ملے ہوتے ہیں، جیسے کہ آج کل رواج ہے کہ دلہن کے گھر والے لڑکے کی والدہ کو شادی کے موقع پر سونے کی بنی ھوٸی کوٸی چیز دیتے ہیں تو اگر بیوی طلاق کا مطالبہ کرتی ہے تو طلاق ہونے کی صورت میں یہ زیور واپس کرنا ہوگا؟ جزاك اللهُ‎

جواب: صورت مسؤلہ میں اگر لڑکی کے گھر والوں نے سونا یا اور کوئی چیز لڑکے کے گھر والوں کو ملکیت کے طور پر دی تھیں، تو اب یہ لڑکے کے گھر والوں کی ملکیت ہے، اور ان چیزوں کو طلاق ہونے کی صورت میں واپس لینا جائز نہیں ہے، البتہ اگر مذکورہ تحائف دیتے وقت کوئی نیت نہیں تھی یا کوئی وضاحت نہیں کی گئی تھی، تو ایسی صورت میں وہاں برادری کے عرف کا اعتبار کیا جائے گا، اگر ان کے عرف میں تحائف ملکیت کے طور پر دیئے جاتے ہوں، تو واپس لینا جائز نہیں ہے، اور اگر ان کے عرف میں یہ تحائف صرف استعمال کرنے کے لئے دیئے جاتے ہوں، تو ان کا واپس لینا جائز ہے۔
واضح رہے کہ اگر طلاق کا مطالبہ بیوی کی طرف سے ہو، تو شرعا اسے "خلع" کہا جاتا ہے، اور خلع کی صورت میں زوجین آپس میں جو مال یا سامان طے کریں گے، وہی دینا لازم ہوگا، اس کے علاوہ جو چیزیں ہیں ان کا حکم وہی ہوگا، جو ماقبل میں ذکر کیا جاچکا ہے۔