سوال: مفتی صاحب ! ہمارے ایک عزیز کا ایکسیڈنٹ ہوا، جس کی وجہ سے وہ 48 گھنٹے بے ہوش رہے، ہوش آنے کے بعد ان 48 گھنٹوں کے دوران جو نمازیں نہیں پڑھ سکے، ان نمازوں کی قضاء کرنی ہوگی یا نہیں؟

جواب: واضح رہے کہ اگر کسی شخص کو بے ہوشی طاری ہوجائے اور چھ نمازوں تک ایسی بے ہوشی رہے کہ مریض کو نماز کے بارے میں اطلاع کرنے سے بھی اطلاع نہیں ہوتی ہو تو ایسی صورت میں بے ہوشی کے دوران کی نمازیں معاف ہوجاتی ہیں اور ہوش میں آنے کے بعد ان نمازوں کی قضاء بھی واجب نہیں ہوتی، البتہ اگر اس سے کم بے ہوشی رہے مثلاً چار یا پانچ نمازیں اس حالت میں گزر جائیں تو وہ نمازیں معاف نہیں ہوتیں، بلکہ ہوش میں آنے کے بعد ان نمازوں کی قضاء واجب ہوگی، لہذا اس ساری تمهید کے بعد پوچھی گئی صورت میں شخص مذکور 48 گھنٹوں کے دوران جو نمازیں نہیں پڑھ سکے، ان نمازوں کی قضاء ان پر لازم نہیں ہے۔