سوال: السلام علیکم، مفتی صاحب ! میرے شوہر نے چند ہفتوں پہلے فون پر میسیج کیا کہ
( by written I divorce you. I am giving you divorce twice)
یعنی میں تمہیں تحریری طور پر طلاق دیتا ہوں، میں تمہیں دو مرتبہ طلاق دیتا ہوں۔
اس واقعہ کے کچھ دنوں بعد ان سے فون پر بات ہو رہی تھی، تو پھر دوبارہ کسی بات پر جھگڑا ہوگیا، جس پر میں نے ان سے کہا کہ اگر میں آپ کو اتنی بری لگتی ہوں تو آپ مجھ سے جان کیوں نہیں چھڑا لیتے؟ تو انہوں نے جواب میں کہا کہ میں تمہیں آزاد کرتا ہوں، میں تمہیں آزاد کرتا ہوں۔
اب میرے شوہر بضد ہیں کہ میری آزاد کرنے سے طلاق مراد نہیں تھی اور میں تمہیں چھوڑنا نہیں چاہتا تھا۔
براہ کرم رہنمائی فرمائیں کہ کیا طلاق واقع نہیں ہوئی اور کیا ہم ساتھ رہ سکتے ہیں؟

جواب: سوال میں ذکر کردہ صورت اگر واقعہ کے مطابق ہے، تو اس کا حکم یہ کہ فون پر بھیجی گئی تحریری دو طلاقوں سے دو طلاق رجعی واقع ہو گئیں، پھر جب شوہر نے کہا کہ "میں تمہیں آزاد کرتا ہوں"، ان الفاظ کا استعمال ہمارے عرف میں صریح طلاق کے لیے ہوتا ہے، لہذا بغیر نیت کے بھی ان الفاظ سے ایک طلاق واقع ہو گئی، اس طرح اس عورت پر تین طلاقیں واقع ہو گئیں اور وہ عورت اپنے شوہر پر حرام ہو گئی ہے۔ نکاح ختم ہوچکا ہے، اس کے بعد دونوں کا ساتھ رہنا یا بات چیت کرنا ناجائز اور حرام ہے، دونوں کو چاہیے کہ فورًا علیحدہ ہوجائیں اور تین طلاقیں واقع ہونے کے بعد جتنا عرصہ ساتھ رہے ہیں، اس پر سچے دل سے توبہ اور استغفار کریں۔
اب اگر دونوں میاں بیوی دوبارہ ایک ساتھ رہنا چاہتے ہیں، تو عورت عدت گزارنے کے بعد کسی دوسرے شخص سے نکاح کرے اور وہ شخص حقوق زوجیت ادا کرنے کے بعد اس عورت کو طلاق دیدے، یا وہ شخص انتقال کر جائے، پھر وہ عورت اپنی عدت مکمل کر کے دوبارہ پہلے شوہر سے نکاح کرلے، تب یہ دونوں ایک دوسرے کے لیے حلال ہوں گے۔