سوال: السلام علیکم، مفتی صاحب ! میرے دادا کی وفات کے بعد میرے ابو اور چچاؤں کے درمیان میراث تقسیم نہیں ہوئی تھی، جائیداد کا مختار نامہ میرے بڑے چچا کے نام تھا، چنانچہ وہ جس طرح چاہتے، میرے ابو اور چچاؤں کی جائیداد کواستعمال کر سکتے تھے، باقی چچاؤں نے تو اپنا حصہ لے کر الگ کاروبار کر لیا، لیکن میرے والد چونکہ بیمار رہتے تھے، اور اپنے بڑے بھائی ہی کے ساتھ رہتے تھے، اس لیے جب بھی انہوں نے جائیداد میں سے اپنا حصہ مانگا، تو چچا نے کہا کہ تم بیمار ہو، کوئی کام تو کر نہیں سکتے، پیسے لے کر اپنا نقصان کرو گے، اس پر والد صاحب خاموش ہو جاتے، اس طرح بڑے چاچا نے میرے والد صاحب کو ان کی زندگی میں کچھ بھی نہیں دیا۔
اب والد صاحب کی وفات کے بعد بڑے چچا کا کہنا ہے کہ والد صاحب کے نام چار کنال زمین ہے، جب کہ باقی چچاؤں کو بارہ کنال زمین ملی ہے اور خود ان کے نام بتیس کنال زمین ہے، جس کے بارے میں ان کا کہنا ہے کہ یہ زمیں میں نے کاروبار کر کے خریدی ہے۔
اس تناظر میں سوال یہ ہے کہ کیا مشترکہ پیسوں سے کیے گئے کاروبار کا نفع اور بنائی گئی جائیداد بھی مشترک ہو گی یا نہیں؟
نیز یہ بھی بتائیں کہ میرے والد صاحب کی میراث کیسے تقسیم ہوگی، اور کیا دادا کی چھوڑی گئی زمین کو اس طرح تقسیم نہیں کرنا چاہیے کہ پہلے دادی کو ملے اور پھر تمام بھائیوں میں برابر میں تقسیم ہو؟
یہ بھی بتائیں کہ کیا میرے بڑے چچا نے جان بوجھ کر والد صاحب کو زندگی میں ان کا حصہ نہ دے کر (جب کہ وہ مسلسل تقاضہ بھی کرتے رہے) ٹھیک کیا؟
نوٹ:
سائلہ بڑے چچا ہی کی حقیقی بیٹی ہے، جسے اس بیمار بھائی نے گود لیا تھا، جس کو بڑے چچا نے ٹال مٹول کر کے اس کے جائز حصہ سے محروم رکھا۔

جواب: صورتِ مسئولہ میں بھائیوں نے اپنے والد کی جائیداد کو جس طریقے سے تقسیم کیا ہے، وہ شرعی طور پر صحیح نہیں ہے، اس لیے کہ اس میں دو بہنوں کو حق میراث سے محروم کردیا گیا ہے ، لہذا صورت مسئولہ میں والد مرحوم اور بیمار بھائی جن کا انتقال ہوا ہے، ان دونوں کی میراث کو از سر نو شرعی طریقے پر تقسیم کرنا ضروری ہے، نیز مشترکہ جائیداد سے اب تک جتنی کمائی حاصل کی گئی ہے، دیانۃ ً ان کو بھی میراث میں شامل کرنا ضروری ہے، اور جس بھائی نے مشترکہ جائیداد میں سے جتنا مال لے کر اپنے لیے خرچ کیا ہے اسے بھی واپس لوٹا کر مال میراث میں شامل کرنا ضروری ہے، البتہ جن بھائیوں نے مشترکہ جائیداد کے منافع کو بڑھانے میں محنت کی ہے ، وہ اپنی محنت کے بدلے عرف (عوم الناس کی عام عادت) کے مطابق اجرت ملنے کے حق دار ہیں۔
نیز غیر شرعی طریقے پر ایک دوسرے کے حصوں میں اب تک ناجائز تصرف کرنے کی وجہ سے آپس میں معافی تلافی اور توبہ واستغفار بھی ضروری ہے۔