سوال: مندرجہ ذیل حدیث کی تصدیق فرما دیں: "رسول اللہ ﷺ نے فرمایا: گھروں میں سب سے حقیر گھر وہ ہے، جس میں ﷲ کی کتاب (قرآن پاک) میں سے کچھ بھی نہیں پڑھا جاتا، سو تم قرآن پاک پڑھا کرو، بیشک تمہیں اس کے ایک حرف کی تلاوت پر دس نیکیوں کا اجر دیا جاتا ہے، جبکہ میں یہ نہیں کہتا کہ "الم" ایک حرف ہے، بلکہ ”الف“ ایک حرف ہے، ”لام“ ایک حرف ہے اور ”میم“ ایک حرف ہے (یعنی صرف الم پڑھنے سے تیس نیکیوں کا ثواب مل جاتا ہے)۔ (رواه الطبراني والحاکم)

جواب: سوال میں مذکور حدیث "حسن " ہے، اس حدیث قرآن کریم کے فضائل میں بیان کیا جا سکتا ہے، ذیل میں اس حدیث کا ترجمہ ، تخریج اور اس کى اسنادى حیثیت بیان کى جاتى ہے۔
ترجمہ:حضرت عبداللہ بن مسعود رضی اللہ عنہ سے مروی ہے کہ رسول اللہ صلی اللہ علیہ وسلم نے ارشاد فرمایا:" تمہارے گھروں میں سب سے خالی اور ویران گھر وہ ہے، جس میں اللہ کی کتاب میں سے کوئی چیز نہ ہو، (یعنی قرآن کریم نہ ہو، یا قرآن کریم ہو، لیکن اس کی تلاوت نہ کى جاتى ہو)، لہذا تم قرآن کریم پڑھا کرو، بے شک تمہیں اس پر اجر ملے گا، ہر حرف کے بدلے دس نیکیاں ملیں گی، میں یہ نہیں کہتا (الم) یہ پورا مجموعہ ایک حرف ہے، بلکہ میں یہ کہتا ہوں کہ اس میں سے الف الگ حرف ہے، لام الگ حرف ہے اور میم الگ حرف ہے( گویا (الم) پڑھنے پر تیس نیکیاں ملیں گیں)"۔(مستدرک حاکم: حدیث نمبر: 2080)
تخریج الحدیث:
1-اس حدیث کو امام حاکم رحمہ اللہ (م 405 ھ) نے "المستدرک على الصحیحین" جلد 1 ص 755، رقم الحدیث (2080)، طبع: دار الکتب العلمیۃ، میں موقوفا ومرفوعا نقل فرمایاہے۔ (1)
2- اس حدیث کو امام بیہقی رحمہ اللہ (م 458 ھ) نے "شعب الإیمان" جلد 3 ص 372، رقم الحدیث (1833) طبع: مکتبۃ الرشد، میں نقل فرمایا ہے۔ (2)
حدیث کى اسنادى حیثیت:
اس حدیث کى سند کو امام حاکم رحمہ اللہ نے صحیح قرار دیا ہے، امام ذہبی رحمہ اللہ نے "تلیخص المستدرک" میں ان کى موافقت فرمائى ہے۔
نیز اس حدیث کو حافظ منذری رحمہ اللہ (م 656ھ) نے امام حاکم رحمہ اللہ کے حوالے سے اپنى کتاب "الترغیب والترھیب" جلد 2 ص 234، رقم الحدیث (2223)، طبع: دار الکتب العلمیة، میں نقل فرمایا ہے، اور اس حدیث کى ابتداء "عن عبد الله بن مسعود رضي الله عنه" کے انداز میں فرمائى ہے، جس سے ان کا اشارہ اس حدیث کے "حسن" ہونے کى طرف ہوتا ہے، اس بات کى صراحت انہوں نے "الترغیب" کے مقدمہ میں فرمائى ہے، لہذا یہ حدیث "حسن" ہے۔ (3)
نیز مذکورہ بالا حدیث کا مضمون دیگر صحابہ کرام رضی اللہ عنہم اجمعین سے بھى مروى ہے۔