عنوان: رشتہ ختم ہونے کی صورت میں منگنی اور نکاح کے تحائف و اخراجات کی واپسی کا حکم

سوال: ایک شخص کی پہلے منگنی ہوئی پھر کچھ عرصے کے بعد نکاح ہوا، رخصتی اب ہونی تھی لیکن جھگڑے کی وجہ سے نہیں ہوئی، جھگڑا سسرال والوں کی طرف سے شروع ہوا، اب بات آکر طلاق پر رکی ہوئی ہے، شوہر منگنی کے موقع پر مختلف مدات میں خرچہ کرچکا ہے، مثلاً: منگیتر کو کپڑے وغیرہ دے دیئے تھے، مٹھائی وغیرہ تقسیم کی تھی، لڑکے والے ان اخراجات کے مطالبے کا شرعا حق رکھتے ہیں یا نہیں؟
نکاح کے وقت اور بعد از نکاح بھی مختلف تحائف دیتا رہا ہے، نیز ڈھائی لاکھ روپے مہر مقرر تھا جس میں سے تقریبا دو لاکھ دے چکا ہے ان اخراجات کا مطالبہ کر سکتا ہے یا نہیں؟
اگر نہیں تواپنے آپ کو نقصان سے بچانے کے لیے اتنے پیسوں کے عوض خلع کرسکتا ہے یا نہیں؟ نیز رخصتی نہ دینے پر جو بے عزتی ہوئی ہے، اس کے عوض مالی جرمانہ لیا جاسکتا ہے یا نہیں ؟ ہمارے ہاں عموماً ایسے معاملات میں علاقے کے میر و معتبر سردار نواب وڈیرے وغیرہ فیصلہ کرتے ہیں اور پھر پیسوں پر صلح کروائی جاتی ہے اور خصمین میں سے جو قصوروار ہو، اس سے پیسے لے کر مخالف کو دئیے جاتے ہیں اور معاملہ نمٹا دیا جاتاہے، شرعاً ان پیسوں کے متعلق بھی بتائیے کہ ان کا لیا جانا درست ہے یا نہیں؟

جواب: ١) منگنی اور نکاح کے موقع پر دی گئی چیزوں میں اگر وہ اشیاء استعمال ہو چکی ہوں (جیسے کھانا، مٹھائی، دعوت وغیرہ) تو ان کی واپسی کا شرعاً کوئی حق نہیں، کیونکہ وہ ہلاک ہو چکی ہیں، البتہ جو اشیاء باقی ہوں (جیسے: کپڑے وغیرہ) تو اگر وہ منگنی کے وقت دی گئی تھیں اور اپنی اصل حالت میں موجود ہوں تو باہمی رضامندی یا قضاء قاضی سے اس کامطالبہ ممکن تو ہے، تاہم ایسا کرنا ہبہ میں رجوع ہونے کی وجہ سے مکروہ ہوگا، جبکہ نکاح کے بعد دیے گئے تحائف اگر بطور ہبہ مالک بناکر دیے گئے ہوں تو فقہِ حنفی میں زوجیت کا تعلّق رجوع فی الہبہ (یعنی ہبہ دے کر واپسی لینے) سے مانع ہے، لہٰذا نکاح کے بعد دی گئی اشیاء واپس لینے کا حق نہیں رہتا۔ ہاں! اگر استعمال کے لیے بطورِ عاریت دیئے گئے ہوں تو پھر واپس لینے کا حق ہوگا۔
۲) اگر نکاح ہو چکا ہو لیکن رخصتی اور خلوتِ صحیحہ نہ ہوئی ہو تو طلاق کی صورت میں عورت نصف مہر کی مستحق ہوتی ہے، لہٰذا اگر کل مہر 2,50,000 روپے تھا تو اس کا نصف 1,25,000 روپے بنتا ہے، چونکہ شوہر 2,00,000 روپے ادا کر چکا ہے، اس لیے وہ زائد ادا شدہ 75,000 روپے واپس لینے کا حق رکھتا ہے، جبکہ 1,25,000 روپے عورت کا شرعی حق ہے اور اس سے واپس نہیں لیے جا سکتے۔
۳) اگر شوہر مزید مالی نقصان سے بچنا چاہے تو خلع کی صورت اختیار کر سکتا ہے، جس میں وہ بیوی کو اس شرط پر علیحدگی کی پیشکش کرے کہ وہ مہر یا دیگر دی گئی اشیاء واپس کر دے۔ اگر عورت اس پر راضی ہو جائے تو خلع (طلاقِ بائن) واقع ہو جائے گی اور طے شدہ مال کی واپسی لازم ہوگی۔ خصوصاً جب قصور عورت یا اس کے گھر والوں کی طرف سے ہو تو خلع میں مال کی واپسی لینا جائز ہے۔
۴) شریعت میں عزّت و آبرو کو مالی چیز نہیں سمجھا جاتا جس کا معاوضہ لیا جائے، اس لیے محض بے عزتی، تاخیر یا بدسلوکی کی بنیاد پر مالی جرمانہ یا ہرجانہ طلب کرنا فقہِ حنفی کے مطابق جائز نہیں ہے۔ اسے "تعزیر بالمال" کہا جاتا ہے جو جمہور احناف کے نزدیک ناجائز ہے۔
۵) جرگہ یا پنچایت کی طرف سے کسی فریق پر زبردستی مالی جرمانہ عائد کر کے دوسرے کو دینا شرعاً درست نہیں، کیونکہ اصول یہ ہے کہ کسی مسلمان کا مال اس کی رضامندی کے بغیر حلال نہیں۔ صرف حقیقی مالی نقصان کی صورت میں اتنی ہی مقدار کا تاوان لیا جا سکتا ہے، لیکن محض قصور، جھگڑے یا بے عزّتی کی بنیاد پر پیسے لینا "اکلِ مال بالباطل" میں داخل ہے جو کہ ناجائز ہے۔