عنوان: رخصتی سے قبل "تم آزاد ہو" جملے سے طلاق کا حکم

سوال: السلام علیکم، مفتی صاحب! اس مسئلہ کے بارے میں رہنمائی فرمائیں: ایک لڑکا لڑکی جن کا نکاح ہو چکا ہے مگر رخصتی نہیں ہوئی، آپس میں بے تکلفی، ہم عمر اور آپس میں کزنز ہونے کی وجہ سے ریسپیکٹ کا ایلیمنٹ بھی ذرا کم ہے۔ اب معاملہ یہ کہ شوہر نے اپنی منکوحہ سے اس کے اور اس کی والدہ کے رویے کی شکایت کی، بات یہاں تک پہنچی کہ شوہر نے کہا تم نے اگر میرے ساتھ رہنا ہے تو تمہیں میری ماننی پڑے گی، ورنہ جیسے تم چاہو، تو بیوی نے کہا میں مانتی ہوں لیکن تمہیں بھی میری بات ماننا ہوگی ورنہ مجھے کسی نے بیچا نہیں ہے، تم نے اگر میرے ساتھ رشتہ رکھنا ہو تو نارمل انسان کی طرح رہنا ورنہ تمہاری مرضی ہے تو شوہر نے کہا پھر تم آزاد ہو، تو بیوی نے کہا کہ یہ طلاق ہے دو بار اور کہہ دو تو شوہر نے کہا کہ میرا ایسا کوئی ارادہ تھا، باقی جو تمھارا دل کرے۔
نوٹ: یہ بات چیت واٹس ایپ پہ تحریری انداز میں ہوئی تھی، اب پوچھنا یہ ہے کہ کیا واقعی ان الفاظ "پھر تم آزاد ہو" سے طلاق واقع ہوجاتی ہے؟ جبکہ بقول شوہر حلفاً اس کا ایسا کوئی ارادہ نہیں تھا۔ اور اگر طلاق ہوجاتی ہے تو کونسی طلاق سمجھی جائے گی اور کتنی ہوں گی؟ رجوع یا دوبارہ نکاح کی کیا صورت ہوگی اور آئندہ کتنی طلاقوں کا اختیار ہوگا؟ اگر طلاق نہیں ہوئی تو یہ گفتگو کس بات پہ محمول کی جائے گی؟ کیا وٹس اپ پہ تحریر لکھ کر بھیجنے سے طلاق واقع ہو جاتی ہے؟ شریعت کی روشنی میں مسئلہ کی وضاحت فرما کر عنداللہ ماجور ہوں۔ جزاكم اللہ خیرا

جواب: واضح رہے کہ جس طرح طلاق کے الفاظ زبان سے ادا کرنے سےطلاق واقع ہوتی ہے، اسی طرح تحریری طلاق دینے کی صورت میں بھی طلاق واقع ہوجاتی ہے، لہذا پوچھی گئی صورت میں جب آپ نے یہ الفاظ واٹس ایپ پر تحریر کیے کہ "تم آزاد ہو" تو چونکہ اس وقت گفتگو کے سیاق و سباق میں طلاق کا قرینہ موجود تھا، اور یہ الفاظ رخصتی سے قبل کہے گئے تھے، اس لیے ان الفاظ سے ایک طلاقِ بائن واقع ہو چکی ہے، اگرچہ آپ کی نیّت طلاق دینے کی نہیں تھی۔
طلاقِ بائن کا حکم یہ ہے کہ طلاقِ بائن کے بعد شوہر کو رجوع کا حق باقی نہیں رہتا، البتہ اگر میاں بیوی دوبارہ نکاح کرنا چاہیں تو نئے مہر کے ساتھ دو گواہوں کی موجودگی میں نیا نکاح کر سکتے ہیں، ایسی صورت میں شوہر کے پاس آئندہ کے لیے دو طلاقوں کا اختیار باقی ہوگا۔

فتوی ارسال کرنے کے بعد سائل کی طرف سے وضاحت:
السلام علیکم،مفتی صاحب! جزاکم اللہ خیرا ،راہنمائی فرمانے پر بہت شکریہ، اس میں ذرا سی مزید رہنمائی درکار ہے کہ ان کے گھر بھی چونکہ بالکل پاس ہیں، اگر موقع پا کر یہ دونوں ملتے بھی ہوں، باہم ملنا، ہاتھ تھامنا، گلے ملنا یا بوس و کنار وغیرہ کی نوبت تک پہنچنی ہو تو کیا یہ خلوت صحیحہ شمار ہوگی یا نہیں؟ اگر یہ خلوت صحیحہ ہے تو پھر طلاق اور رجوع کا کیا حکم ہوگا؟ جزاكم اللہ خیرا

دارالافتاء کی طرف سے سائل کی وضاحت کا جواب:
واضح رہے کہ "خلوتِ صحیحہ" سے مراد یہ ہے کہ شوہر اور بیوی ایسی جگہ تنہائی میں جمع ہوں جہاں ازدواجی تعلق قائم کرنے میں کوئی حسّی، شرعی یا طبعی رکاوٹ موجود نہ ہو۔ ایسی صورت میں اگرچہ حقیقتاً جماع نہ بھی ہوا ہو، تب بھی خلوتِ صحیحہ ثابت ہو جاتی ہے۔
آپ کے سوال میں اگر بوس و کنار یا ہاتھ پکڑنے کے علاوہ جماع میں کوئی رکاوٹ موجود نہیں تھی، تو خلوتِ صحیحہ ثابت ہو چکی ہے۔ ایسی صورت میں "تم آزاد ہو" کے الفاظ سے طلاقِ رجعی واقع ہوگی۔ طلاقِ رجعی میں شوہر عدت (تین حیض) کے دوران رجوع کرسکتا ہے، البتہ اگر عدت گزر جائے تو یہی طلاق، طلاقِ بائن کے حکم میں تبدیل ہو جاتی ہے، جس کے بعد بغیر نئے نکاح کے رجوع ممکن نہیں رہتا۔
البتہ اگر صرف بوس و کنار وغیرہ ہوا ہو، لیکن جماع کے لیے کوئی حسّی، شرعی یا طبعی مانع موجود تھا، تو اس صورت میں نہ خلوتِ صحیحہ ثابت ہوگی اور نہ رخصتی، لہٰذا ایسی حالت میں "تم آزاد ہو" کے الفاظ سے طلاقِ بائن واقع ہوگی۔