عنوان: عنوان:امام ابوحنیفہ رحمہ اللہ کا مرض الوفات میں جوربین پر مسح ، اور اپنی رائے سے رجوع فرمانا

سوال: محترم مفتی صاحب، مجھے درجِ ذیل روایت کی روشنی میں سوال پوچھنا تھا کہ اگر اونی موزے یا کپڑے سے تیار کردہ موزوں پر مسح نہیں ہے، صرف چمڑے کے موزوں پر مسح جائز ہے تو پھر ہمارے مسلک کے بانی امام ابوحنیفہ رحمہ اللہ نےکپڑے کے موزہ پر مسح کیوں کیا، جیسا کہ درجِ ذیل روایت سے معلوم ہوتا ہے؟ براہِ کرم اس کا جواب قرآن وحدیث سے مرحمت فرمادیں۔
امام ابوعیسی ترمذی رحمہ اللہ فرماتے ہیں کہ میں نے صالح بن محمد ترمذی کو فرماتے ہوئے سنا کہ میں نے ابو مقاتل سمرقندی کو فرماتے ہوئے سنا وہ فرماتے ہیں کہ" میں ایک دن امام ابو حنیفہ رحمہ اللہ جب مرض الموت میں مبتلا تھے تو ان کی زیارت کو گیا تو میں نے دیکھا کہ امام ابو حنیفہ رحمہ اللہ نے وضو کے لئے پانی منگوایا اور وضو کرنے کے بعد اپنے دونوں موزے( جو کپڑے کے تھے) پر مسح کیا پھر فرمایا: میں نے آج وہ عمل کیا ہے جسے میں نے پہلے کبھی نہیں کیا تھا، میں نے اپنے ان موزے پر مسح کیا جو چمڑے کے نہیں ہیں"۔ (سنن ترمذی: ۱/۱۶۹)

جواب: واضح رہے کہ ہر سوال کے جواب کے لئے قرآن مجید کی صریح آیت اور حدیث مبارک کا مطالبہ کرنا درست نہیں، کیونکہ بعض مسائل صراحتاً قرآن وحدیث میں نہیں ملتے، بلکہ ان کے لیے ہمیں معتبر کتب لغت، فقہاء کی آراء، امّت کے متفقہ تعامل سمیت فریق ثانی کی پیش کردہ روایات کی صحت وسقم کی جانچ پڑتال کے بعد ہی شرعی مسئلہ کی جانب درست رہنمائی کی جاسکتی ہے۔
باقی جہاں تک سوال میں پوچھی گئی روایت کا تعلق ہے تو یہ عبارت ترمذی شریف کے مشہور نسخوں میں نہیں ہے، البتہ علامہ عابد سندھی والے قلمی نسخے میں یہ عبارت موجود ہے۔ بہرحال اس کا مطلب یہ ہے کہ امام ابو حنیفہ رحمہ اللہ جوربین کی قسم "ثخینین"(غیر منعل وغیر مجلد) پر مسح کے جواز کے قائل ہوگئے تھے۔ اس سے یہ ہرگز ثابت نہیں ہوتا ہے کہ آپ نے مطلقاؐ کپڑے کے موزوں پر مسح کیا یا اس کے جواز کا فتوی دیا، بلکہ انہوں نے چمڑے کے موزے کی طرح چند مخصوص شرائط کے حامل موزوں پر مسح کے جواز کا فتوی دیا ہے، جس کو جوربین کی قسم "ثخینین" سے تعبیر کیا جاتا ہے۔
مزید تفصیل یوں سمجھی جاسکتی ہے کہ متعدّد احادیث مبارکہ سے ثابت ہے کہ "جراب " کی اقسام میں سے" مجلّد" اور "منعّل" پر مسح بالاتفاق درست ہے، باقی "جراب " کی ایک قسم "ثخینین " ہے، اس میں امام ابوحنیفہ اور صاحبین رحمہم اللہ کے درمیان ایک عرصہ تک اختلاف رہا، اس سے مراد چمڑے کی مانند ایسے موزے ہیں، جن میں تین اوصاف موجود ہوں:(1) جن پر پانی ڈالا جائے تو موٹے ہونے کی وجہ سے ان میں پانی نہ چھنتا ہو۔ (2) ان کو پہن کر (بغیر جوتوں ) میں تین میل پیدل چلنا ممکن ہو۔ (3) وہ بغیر کسی چیز سے باندھے اپنی موٹائی اور سختی کی وجہ سے پنڈلی پر خود قائم رہ سکتے ہوں۔ مذکورہ اوصاف کی حامل " جرابیں" کیا خفین(چمڑے کے موزوں)کے حکم میں داخل ہیں یا نہیں؟
اس مسئلہ میں صاحبین رحمہما اللہ نے مذکورہ اوصاف کو شرائط قرار دے کر استدلال کی اقسام میں سے "دلالة النّص"(ایسا معنی ومفہوم جو الفاظ سے ثابت نہ ہوں، بلکہ ایسی علّت و سبب اس حکم کا باعث ہو جو اہل لسان بخوبی سمجھ سکتے ہوں) اور فتاوی تابعین (مثلاً حضرت حسن بصری اور سعید بن المسیب رحمہا اللہ) کی روشنی میں "خفین" (چمڑے کے موزے) کے حکم میں داخل کیا ہے۔ باقی مسلک حنفیت کے بانی امام ابو حنیفہ رحمہ اللہ کا ابتداء میں یہ موقف رہا تھا کہ وہ جوربین کی قسم"ثخینین"کو مسح کے حکم میں داخل تسلیم نہیں کرتے تھے، چونکہ خود "جوربین" پر مسح سے متعلق روایات سنداً ضعیف ہیں۔ یہی وجہ ہے کہ ذخیرہ احادیث میں غور کرنے سے اس حوالہ سے ہمیں تین حدیثیں ملتی ہیں ، جن میں سے حضرت ابوموسی اشعری اور بلال رضی اللہ عنہما سے منقول روایات کو حافظ زیلعی رحمہ اللہ نے سندا ضعیف قرار دیا ہے۔ صرف حضرت مغیرہ بن شعبہ رضی اللہ عنہ کی حدیث ایسی ہے جس کو امام ترمذی رحمہ اللہ نے "حسن صحیح" لکھا ہے، تاہم دیگر جلیل القدر محدّثین عظام رحمہ اللہ نےا س پر سخت تنقید کی ہے۔ (فقہی مقالات، از مفتی محمد تقی عثمانی، مروجہ مّوزوں پر مسح کا حکم،20/2، ضبط وترتیب :محمد عبداللہ میمن ، میمن اسلامک پبلشرز)
بہرحال! روایات کے سنداً ضعیف ہونے اور "جوربین" کی مختلف اقسام میں سے ایک قسم باریک کپڑے سے تیار کردہ موزوں کے عام رواج میں چلن اور معتبر کتب لغت سے تائید ملنے کی بناء پر امام ابوحنیفہ رحمہ اللہ نے ابتداء میں جوربین کی قسم "ثخینین" پر مسح کی اجازت نہیں دی، تاہم ایک عرصہ بعد مزید غور ووفکر کے نتیجہ میں امام ابوحنیفہ رحمہ اللہ نے مرض الوفات میں اپنی سابقہ رائے سے رجوع فرماکر از خود جوربین کی قسم" ثخینین" پر مسح فرمایا اور اس پر مسح کے جواز کا فتوی دیا۔ اور یہی آپ رحمہ اللہ کا طرز تحقیق رہا ہے کہ اگر اپنے فتوی پر کوئی بہتر بات یا حدیث ملتی تو فوراً اپنی بات سے رجوع فرمالیتے تھے، جو ان کی دیانت وصداقت پر واضح دلیل ہے۔
تاہم جس قسم کے سوتی، اونی یا نائیلون کے موزے آج کل رائج ہیں، جیسا کہ سائل کو حدیث کے ترجمہ سمجھنے میں مغالطہ ہوا ہے، اور اس کو "کپڑے کے موزے" سے تعبیر کیا ہے، ان پر مسح کرنا ائمّہ مجتہدین میں سےکسی کے نزدیک بھی جائز نہیں۔
چونکہ امام ابوحنیفہ سے متعلق روایت میں "جوربین " پر مسح کا تذکرہ ملتا ہے، وہ دراصل چمڑے کے تھے یا اپنی موٹائی کی وجہ سے چمڑے کے موزوں کی طرح تھے۔ جیسا کہ متعدّد صحابہ کرام رضی اللہ عنہم سے جوربین پر مسح ثابت ہے، اسی بناء پر مشہور تابعین حضرت حسن بصری اور سعید بن مسیب رحمہما اللہ نے صحابہ کرام رضی اللہ عنہم کے عمل کو دیکھ کر ہی فتوی دیا ہے، چنانچہ ان کا فتوی مصنف بن ابی شیبہ میں درج ہے کہ "ایسے جرابوں پر مسح جائز ہے جو خوب مضبوط اور دبیز ہوں"۔ اسی موٹائی اور مضبوطی کی وضاحت کے لئے فقہاء کرام رحمہم اللہ نے مذکورہ تین شرائط کو لازم قرار دیا ہے۔