عنوان: کپڑے کی رنگائی کی صورت میں ادھار رقم کو کم قیمت پر نقد خریدنے کا حکم اور جائز متبادل طریقہ

سوال: میرا ایک دوست ہے جو کپڑوں کو رنگنے کا کام کرتا ہے، اس کے پاس کپڑا رنگنے کے لیے آتا ہے، وہ کپڑے کو رنگ کر اپنے کسٹمر کودے دیتا ہے، کسٹمراسے تین چار مہینے بعد پیسے دیتا ہے، اب میرے دوست کو پیسوں کی ضرورت ہے، میرے دوست نے میرے سامنے ایک تجویز رکھی ہے۔ وہ یہ کہ اس کے پاس کپڑے کو رنگنے کا ایک کنٹریکٹ ہے، وہ کہتا ہے کہ تم مجھ سے اس کنٹریکٹ کے لیے اجارہ کا عقد کرلو اور مجھے ڈسکاونٹ ریٹ پہ پیشگی پیسے دے دو، پھر میں تمہارا وکیل بن کر یہ سروس اپنے کسٹمر کو دوں گا، اور پھر جب مجھے اپنے کسٹمر سے چار مہینے بعد پیسے ملیں گے، وہ پیسے میں تمہیں لا کے دے دوں گا، یعنی میں اپنے دوست کے ساتھ اجارۃ الاشخاص کا عقد کرکے اسے اس خاص کنٹریکٹ کے لیے اجرت پہ لے لوں گا، اگر وہ کپڑا پانچ لاکھ روپے کا رنگ کرکے دے گا تو میں اسے چار لاکھ روپے پیشگی دے کر اجارہ پہ لے لوں اور اسے اپنا وکیل بنا کر یہ کہوں گا کہ اب یہ سروس میرے وکیل بن کر آگے کسٹمر کو فراہم کرو اور جب اس کے پاس سے سروس دینے کے بعد پیمنٹ آئے تو وہ پیسے لا کے مجھے دے دو۔ معلوم یہ کرنا ہے کہ کیا میرا اپنے دوست کے ساتھ اس طرح کا عقد کرنا اور نفع کمانا شرعا جائز ہے؟ قرا ن و حدیث کی روشنی میں جواب عنایت فرماکر ممنون ومشکور فرمائیں۔

جواب: پوچھی گئی صورت میں اگر کپڑے رنگنے کا معاہدہ پہلے ہی آپ کے دوست اور کسٹمر کے درمیان منعقد ہو چکا ہو تو اس کے بعد اسی معاہدہ کو بنیاد بنا کر (اجارۃ الاشخاص کا عقد کرنا) پیشگی کم رقم مثلاً: چار لاکھ روپے ادا کرنا اور بعد میں اسی معاہدہ سے وصول ہونے والی زیادہ رقم مثلاً پانچ لاکھ روپے وصول کرنا شرعاً درست نہیں، کیونکہ اس معاہدہ کے حقوق و ذمہ داریاں اور اجرت کا استحقاق پہلے ہی آپ کے دوست کے لیے ثابت ہو چکا ہے، لہٰذا بعد میں اجارہ کا عقد در حقیقت ایک قائم شدہ مالی حق کے عوض پیشگی رقم فراہم کرکے زائد رقم حاصل کرنے کا ذریعہ بن جاتا ہے۔ اس لیے یہ اجارہ اپنے حقیقی مقصد کے بجائے محض سرمایہ کاری (Financing) کا حیلہ بن جاتا ہے، جو شرعاً درست نہیں ہے۔
مذکورہ صورت میں جائز متبادل یہ ہوسکتا ہے کہ اجارۃ الاشخاص کے بجائے مضاربت کا معاملہ کیا جائے، اس طور پر کہ آپ اس مخصوص رنگائی کے کنٹریکٹ میں بطورِ رب المال سرمایہ ( 4 لاکھ ) فراہم کریں اور آپ کا دوست بطورِ مضارب اپنی محنت، مہارت اور انتظام کے ذریعے رنگائی کا کام مکمل کرے۔ جب کسٹمر سے اس کنٹریکٹ کی رقم وصول ہو جائے تو پہلے اصل سرمایہ( 4 لاکھ )واپس کیا جائے، پھر اسی کنٹریکٹ سے حاصل ہونے والا حقیقی نفع پہلے سے طے شدہ تناسب ( مثلاً %50, %50 یا %60 ,%40) کے مطابق تقسیم کیا جائے۔ اگر مضارب کی تعدی یا کوتاہی کے بغیر اس کنٹریکٹ میں حقیقی نقصان ہو تو وہ سرمایہ پر ہوگا، جبکہ مضارب کی محنت ضائع ہوگی۔ اس طرح اگر معاملہ کر لیا جائے تو یہ شرعاً درست ہوگا۔