سوال: مجھے حضرت امیر معاویہ رضی اللہ عنہ کے فضائل کے بارے میں احادیث درکار ہیں، برائے مہربانی معاونت فرمائیں۔

جواب: حضرت امیر معاویہ رضی اللہ عنہ ان چند منتخب اور چنیدہ افراد میں سے ہیں، جنہیں نبیﷺ کی صحبت سے شرفیابی کا موقع نصیب ہوا، چنانچہ وہ تمام فضائل ومناقب جو مطلقاً بغیر کسی تقیید وتخصیص کے مجموعی طور پر جماعت صحابہ رضی اللہ عنہم کے بارےمیں وارد ہوئے ہیں، ان کا مصداق جہاں پوری جماعت صحابہ ہے، بعینہ اسی طرح ان فضائل وکرامات میں حضرت معاویہ رضی اللہ عنہ بھی برابر کے شریک وسہیم ہیں، البتہ خاص آپ رضی اللہ عنہ سے متعلق بہت سے فضائل وارد ہوئے ہیں، سردست چند مستند کتب سے فضائل ذیل میں پیش کیے جاتے ہیں:
(1) عبدالرحمٰن بن ابی عمیرہ رضی اللہ عنہ سے روایت ہے کہ نبی صلی اللہ علیہ وسلم نے حضرت معاویہ رضی اللہ عنہ کے متعلق دعا فرمائی :" اے اللہ،اسے لوگوں کے واسطےراہنما اور ہدایت یافتہ بنادے اور اس کے ذریعے لوگوں کو ہدایت سے نواز دے"۔
(سنن الترمذی، ابواب المناقب، باب مناقب معاویة بن أبي سفیان، رقم الحدیث:3842، 169/6، دار الغرب الاسلامي)
(2) حضرت ام ّحرام رضی اللہ عنہا سے روایت ہے کہ رسول اللہ ﷺ نے ارشادفرمایا :"میری اُمت کا پہلا لشکر جو سمندری جہاد کرے گا، ان کے لئے جنت واجب ہے۔"
(صحیح البخاري، لمحمد بن إسماعیل البخاري الجعفي، باب ما قیل في قتل الروم، 42/4، رقم الحدیث: 2942، المحقق: محمد زهير بن ناصر الناصر، الناشر: دار طوق النجاة)
نوٹ: اس روایت کے ذیل میں محدثین عظام رحمہم اللہ لکھتے ہیں:" پہلی بار غزوہ بحر 27ھ میں پیش آیا تھا، جس کو" غزوہ قبرص " کہتے ہیں، اس میں حضرت عبادہ بن صامت اور ا ن کی اہلیہ محترمہ حضرت ام حرام رضی اللہ عنہما شامل تھیں، اس بحری غزوہ کے امیر لشکر حضرت امیر معاویہ رضی اللہ عنہ تھے۔(سیرت امیر معاویہ، مولانامحمد نافع گل صاحب، 266/1، دار الکتاب،2007ء)
(3) عرباض بن ساریہ السلمی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ: "اے اللہ! معاویہ کو کتاب و حساب کا علم عطا فرما، اور اُسے عذاب سے محفوظ فرما"۔
(مسند أحمد، حدیث العرباض بن ساریة-رضي الله عنه-، رقم الحدیث:17152، 383/28، المحقق: شعيب الأرنؤوط - عادل مرشد، وآخرون، إشراف: د عبد الله بن عبد المحسن التركي، الناشر: مؤسسة الرسالة)
(4)عبدالملک بن عبدالحمید نے امام احمد بن حنبل رحمہ اللہ سے دریافت کیا کہ کیا نبی ﷺ نے یوں ارشاد نہیں فرمایا: (قیامت کے دن ) ہر نسب وسسرال(رشتہ کے لحاظ سے) منقطع ہوجائے گا، سوائے میرے نسب وسسرال کے؟ فرمایا: بالکل ارشاد فرمایا ہے۔ میں نے عرض کیا کہ کیا حضرت معاویہ رضی اللہ عنہ کے لیے بھی یہ فضیلت ثابت ہوگی؟ فرمایا : بالکل ، ان کے لیے نسب وسسرال دونوں تعلق ثابت ہیں، پھر کہتے ہیں کہ میں نے امام احمد بن حنبل کو فرماتے سنا : حضرت معاویہ رضی اللہ عنہ کے مقابلے میں ان کے خلاف زبان درازی کرنے والوں کی کیا حیثیت ہے بھلا؟ اللہ ہمیں(ان کے خلاف بدگوئی سے) عافیت میں رکھے۔
(السنة، لأبي بکر أحمد بن محمد الخلال، ذكر أبي عبد الرحمن معاوية بن أبي سفيان وخلافته، رضوان الله عليه، 432/1، المحقق: د. عطية الزهراني، الناشر: دار الراية – الرياض)