سوال: مجھے حضرت امیر معاویہ رضی اللہ عنہ کے فضائل کے بارے میں احادیث درکار ہیں، برائے مہربانی معاونت فرمائیں۔

جواب: حضرت امیر معاویہ رضی اللہ عنہ کی فضیلت کے بارے میں چند رویات درج ذیل ہیں:
(1) عبدالرحمٰن بن ابی عمیرہ رضی اللہ عنہ سے روایت ہے کہ نبی صلی اللہ علیہ وسلم نے حضرت معاویہ رضی اللہ عنہ کے لئے فرمایا کہ:" اے اللہ! اسے ہدایت یافتہ بنادے اور اس کے ذریعے لوگوں کو ہدایت دے"
(سنن الترمذی۔٣٨٤٢ وقال؛ ھذا حدیث حسن غریب)
(2) صحیح بخاری میں رسول اللہ صلی اللہ کا ارشاد ہے کہ :"میری اُمت کا پہلا لشکر جو سمندر میں جہاد کرے گا، ان کے لئے جنت واجب ہے۔"
(صحیح بخاری ٢٩٢٤)
محدثین اس حدیث کی ذیل میں لکھتے ہیں کہ یہ جہاد سیدنا معاویہ بن ابی سفیان رضی اللہ عنہ کی خلافت کے زمانے میں ہوا تھا، اور اس جہاد میں سیدنا معاویہ رضی اللہ عنہ شامل تھے۔
(دیکھئے صحیح بخاری ٢٧٩٩۔٢٨٠٠، ٦٢٨٢۔٦٢٨٣)
(3) عرباض بن ساریہ السلمی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ:"اللھم علم معاویۃ الکتاب والحساب، وقه العذاب"
ترجمہ:"اے میرے اللہ! معاویہ کو کتاب و حساب سکھا اور اُسے عذاب سے بچا۔"
(مسند احمد ٤\١٢٧ ح ١٧١٥٢ وسند حسن، صحیح ابن خزیمہ ١٩٣٨)
(4)امیر معاویہ رضی اللہ عنہ کاتبین وحی میں سے تھے۔
(صحیح مسلم:2604)
(5)رسول اللہ صلی اللہ علیہ وسلم نے حضرت معاویہ رضی عنہ کے دور کو بھی رحمت کا دور قرار دیا، چنانچہ رسول اللہ صلی اللہ علیہ وسلم کا ارشاد ہے کہ"اسلام کا اول دور نبوی رحمت کا ہے، اس کے بعد خلافت کی رحمت ہے، اور اس کے بعد ملوکیت کی رحمت ہے"