سوال: السلام علیکم و رحمۃ اللہ وبرکاتہ
سوال یہ ہےکہ تین جمعوں کی نمازیں نہ پڑھے تو انسان کافر ہوجاتا ہے، مگر جب سے کرونا وائرس کی وجہ سے نماز جمعہ بھی گھروں میں پڑھنے کا حکم دیا گیا ہے، جبکہ نماز جمعہ گھر میں نہیں ہوتی، اب تک تقریبا 7جمعہ کی نمازیں مسجد میں نہیں ہوئی ہیں، کیا اس سے مسلمان کافر ہوجاتاہے۔

جواب:  مسلسل تین جمعہ کی نمازیں نہ پڑھنے سے کوئی مسلمان کافر نہیں ہوتا، لیکن بغیر عذر کے اور سستی کی وجہ سے نماز جمعہ چھوڑنا سخت گناہ ہے، احادیث مبارکہ میں اس پر سخت وعید آئی ہے کہ اس کے دل پر مہر لگادی جاتی ہے، البتہ محض گناہ کے ارتکاب سے کوئی مسلمان دائرہ اسلام سے خارج نہیں ہوتا، الا یہ کہ اس میں اللہ رب العزت کی طرف سے مقرر کردہ فریضہ کی تحقیر شامل ہو، تو یہ کفر کا موجب ہے۔

جہاں تک موجودہ وبا کی مخصوص صورتحال میں، حکومتی پابندی کی وجہ سے جمعہ نہ پڑھنے کا تعلق ہے، تو ان حالات میں وبا سے تحفظ اور حکومتی جائز قانون پر عمل کرنا شریعت کا ہی حکم ہے، ظاہر ہے کہ ان حالات میں جمعہ نہ پڑھنا نماز جمعہ کی تحقیر یا سستی کی وجہ سے نہیں تھا، بلکہ اسی شرعی حکم پر عمل کیا گیا، جوکہ ایک معقول شرعی عذر پر مبنی تھا، جس سے کوئی گناہ نہیں ہوا، کفر تو بہت بڑی بات ہے۔