سوال: کیا فرماتے ہیں علمائے کرام اس مسئلہ کے بارے میں ہمارے ایک رشتہ دار کا نکاح ہوا، ابھی رخصتی نہیں ہوئی تھی اور انہوں نے اپنی بیوی کو کسی بات پر ناراضگی کی وجہ سے تین طلاقیں دے دیں۔ معلوم یہ کرنا ہے کہ کتنی طلاقیں واقع ہوئی ہیں اور دوبارہ رجوع ہوسکتا ہے اور عورت پر عدت اور مرد پر مہر لازم ہوگا یا نہیں؟

جواب: رخصتی سے پہلے بھی طلاق دینے سے طلاق واقع ہوجاتی ہے، البتہ اگر تین طلاق اکھٹی دی ہوں تو تینوں واقع ہوجاتی ہیں، عورت بغیر عدت کے دوسری جگہ شادی کرسکتی ہے، اگر تین طلاق علیحدہ علیحدہ دی ہوں تو ایک طلاق بائن واقع ہوگی، عورت پر عدت لازم نہیں ہے۔ اس صورت میں اگر طرفین کی رضامندی کے ساتھ دوبارہ نکاح کرنا چاہیں تو بغیر حلالہ شرعیہ کے نئے مہر اور دو گواہوں کی موجودگی میں نکاح کرسکتے ہیں، البتہ شوہر کے اوپر پہلے نکاح کا نصف مہر دینا واجب ہے۔