عنوان: مسئلے سے ناواقفیت طلاق کے وقوع پر اثر انداز نہیں ہوتی

سوال: السلام علیکم ورحمۃ اللہ وبرکاتہ! ہم نیویارک، امریکہ میں رہنے والا ایک خاندان ہیں۔ تقریباً تین ماہ قبل میں نے اپنی بیوی کو ٹیکسٹ میسج کے ذریعے تین مرتبہ طلاق، طلاق، طلاق لکھ کر بھیجا، اس کے چند دن بعد ہمارے درمیان ازدواجی تعلق قائم ہوا۔ اس کے اگلے دن میں نے دوبارہ دو الگ الگ پیغامات میں تین تین مرتبہ طلاق، طلاق، طلاق لکھ کر بھیجا اور اس کے ایک دن بعد ایک اور پیغام میں تین مرتبہ طلاق، طلاق، طلاق لکھا، اس دوران ایک بحث کے موقع پر میں نے بچوں کے سامنے بھی کہا کہ میں نے اسے طلاق دے دی ہے اور وہ عدت میں ہے۔
اللہ تعالیٰ جانتا ہے کہ ان تمام مواقع پر میری نیت یہی تھی کہ وہ میری بیوی ہے اور میں اسے معاملات کو سنجیدگی سے لینے کے لیے تنبیہ کر رہا ہوں، لیکن مجھے معلوم نہیں تھا کہ طلاق کا لفظ اتنا حساس ہے اور ٹیکسٹ میسج کے ذریعے بھی اس کے شرعی اثرات مرتب ہوسکتے ہیں۔ میرا خیال تھا کہ طلاق صرف زبانی طور پر اور گواہوں کی موجودگی میں دینے سے واقع ہوتی ہے۔
اس کے بعد میری بیوی نے معذرت کرلی اور ہم دونوں نے اس معاملے کو ختم سمجھ کر معمول کی زندگی شروع کردی، اگلے ہی دن ہم نے ایک ہوٹل میں ازدواجی تعلق بھی قائم کیا۔
اب ہم شرعی رہنمائی چاہتے ہیں کہ آیا مذکورہ صورتِ حال میں طلاق واقع ہوچکی ہے یا ہم اب بھی میاں بیوی ہیں؟ ہمارے تین بچے ہیں اور ہم دونوں اپنے خاندان کو بچانا چاہتے ہیں۔

جواب: واضح رہے کہ طلاق کے صریح الفاظ جیسے: "طلاق" سے بغیر نیت کے طلاق واقع ہو جاتی ہے، خواہ وہ زبان سے کہے جائیں یا میسج میں لکھ کر بھیجے جائیں۔ اس لیے یہ کہنا کہ میرا ارادہ طلاق دینے کا نہیں بلکہ بیوی کو تنبیہ کرنا تھا یا مجھے معلوم نہیں تھا کہ میسج سے بھی طلاق ہو جاتی ہے، شرعی اعتبار سے قابلِ قبول نہیں، مسئلے سے ناواقفیت طلاق کے وقوع پر اثر انداز نہیں ہوتی۔
لہٰذا پوچھی گئی صورت میں جب شوہر نے اپنی بیوی کو ایک ہی میسج میں "طلاق، طلاق، طلاق" لکھ کر بھیجا تو اسی وقت تینوں طلاقیں واقع ہوگئیں اور نکاح ختم ہو گیا۔ بعد کے میسجز اور بچوں کے سامنے یہ کہنا کہ میں نے طلاق دے دی ہے اور وہ عدت میں ہے، اس حکم کی تائید کرتے ہیں، ان سے کوئی نیا حکم ثابت نہیں ہوا، اب نہ رجوع کی گنجائش ہے اور نہ باہمی رضامندی سے دوبارہ نکاح کیا جا سکتا ہے۔
چونکہ نکاح پہلی ہی بار ختم ہو چکا تھا، اس کے بعد بیوی کے ساتھ رہنا اور ازدواجی تعلق قائم کرنا شرعاً جائز نہیں تھا، دونوں پر لازم ہے کہ اس پر اللہ تعالیٰ سے سچی توبہ و استغفار کریں اور فوراً الگ ہو جائیں۔ البتہ اگر عورت پہلے شوہر کی عدت گزار کر کسی اور مرد سے شرعی طریقے سے نکاح کرے اور اس کے ساتھ ازدواجی تعلقات قائم ہونے کے بعد دوسرا شوہر اسے خود طلاق دے دے یا اس کا انتقال ہو جائے، اورعورت اس کی عدت بھی گزار لے تو اس کے بعد پہلے شوہر سے نیا نکاح کرنا جائز ہوگا۔