سوال: مفتی صاحب ! اگر لڑکی خلع لے اور لڑکا اس کا حق مہر معاف کردے یا لڑکا طلاق دے اور لڑکی اپنا حق مہر معاف کر دے، تو کیا اس طرح حق مہر معاف ہو جاتا ہے یا پھر معاف کرنے کے بعد بھی ادائیگی لازم ہو گی؟

جواب: واضح رہے کہ اگر میاں بیوی دونوں کے درمیان نباہ نہ ہوسکے، تو بوقتِ ضرورت مہر یا مال کے بدلے علیحدگی اختیار کرنا جائز ہے، البتہ اگر نشوز (نافرمانی) شوہر کی طرف سے ہے، تو شوہر کیلئے مہر کی رقم یا دوسرا کوئی بھی مال بیوی سے طلاق کے بدلے لینا جائز نہیں ہے، لیکن اگر نشوز (نافرمانی) بیوی کی طرف سے ہے، تو پھر شوہر بقدر مہر رقم لے سکتا ہے، اس سے زیادہ نہ لیا جائے، تو بہتر ہے، البتہ اگر زیادہ لے لیا، تو یہ خلاف اولیٰ ہے، اور جو رقم یا چیز طلاق دینے کے بدلے معاف کروائی جائے، وہ معاف ہو جائے گی، بعد میں اس کو ادا کرنا لازم نہیں ہوگا۔