سوال: کیا فرماتے ہیں علماء کرام آج کل عورت کے رحم میں ایک خاص طریقہ سے منی ڈالی جاتی ہے، جس کو ٹیسٹ ٹیوب بے بی کہا جاتا ہے، آیا اس طریقہ سے رحم میں منی ڈالنے کی صورت میں عورت پر غسل واجب ہوگا یا نہیں؟

جواب: وجوبِ غسل کا سبب خروجِ منی یا دخولِ منی نہیں، بلکہ اصل علت اس میں لذت اور تسکین قلب ہوتی ہے، جو شہوت کے ذریعے حاصل ہوتی ہے، ٹیسٹ ٹیوب بے بی میں لذت اور تسکین کی علت مفقود ہوتی ہے اور اس میں صرف مادہ منویہ عورت کے رحم میں بذریعہ مشین پہنچایا جاتا ہے، ظاہر ہے کہ اس طریقہ سے وہ لذت و تسکین نہیں، جو مرد کے جماع کرنے سے عورت کو حاصل ہوتی ہے، لہٰذا ٹیسٹ ٹیوب بے بی کے ذریعہ مادہ پہنچانے سے غسل واجب نہیں ہوگا، البتہ احتیاطاً غسل کرنا بہتر ہے۔ ہاں ! اگر ٹیسٹ ٹیوب کے عمل کے وقت عورت کو انزال ہوجائے تو تب غسل واجب ہوگا۔