سوال: مفتی صاحب! اگر کسی کا نماز کے دوران وضو ٹوٹ جائے، اور وہ وضو کرنے چلا جائے، تو کیا بعد میں آکر وہ اپنی بقیہ نماز ادا کرے گا یا دوبارہ سے پوری نماز پڑھے گا؟

جواب: صورت مسؤلہ میں بہتر طریقہ تو یہ ہے کہ نئے سرے سے پوری نماز پڑھے، لیکن اگر اسی نماز کو پورا کرنا چاہے، تو اس کا طریقہ یہ ہے کہ اگر امام نماز سے ابھی تک فارغ نہ ہوا ہو، تو نماز کا جتنا حصہ اس کی غیر موجودگی میں پڑھا جاچکا ہے، پہلے اس کو ادا کرے، اس کے بعد امام کے ساتھ شامل ہو جائے، اور اگر اس کے آنے تک امام نماز سے فارغ ہو چکا ہو، تو جتنی نماز رہ گئی تھی، اس کو اس طرح ادا کرے، گویا امام کے پیچھے پڑھ رہا ہے۔