سوال: مفتی صاحب ! اکثر بروکر حضرات مالک مکان سے زمین کی قیمت مثلاً: پندرہ لاکھ کی قیمت لے کر خریدار کو اٹھارہ لاکھ بتا کر اضافی تین لاکھ اپنے پاس رکھتے ہیں، جب کہ اس پندرہ لاکھ میں بھی ان کا کمیشن مثلاً: دوفیصد طے ہوتا ہے، کیا ایسا کرنا درست ہے؟

جواب: صورت مسؤلہ میں بروکر بائع (فروخت کرنے والے) کا وکیل ہے، اور وکیل اپنے موکل کی طرف سے مقرر کردہ اجرت کا مستحق ہوتا ہے، جبکہ عقد میں نفع نقصان کا مالک مؤکل ہوتا ہے، لہٰذا بروکر صرف اپنی مقررہ اجرت کا مستحق ہوگا، اس کے علاوہ جس قدر نفع حاصل ہوا ہے، وہ سب مؤکل کی ملکیت شمار ہوگا، بروکر کے لئے اس نفع کا لینا خیانت اور دھوکہ دہی کے زمرے میں آتا ہے، لہذا بروکر کے لئے اس نفع کو لینا جائز نہیں ہے۔