سوال:
آپ سے پوچھنا یہ ہے کہ اگر امام سے عید الفطر یا عید الاضحیٰ کی نماز میں غلطی ہوجائے، اور وہ سورۃ الفاتحہ پڑھنا بھول جائے، تو کیا سجدۂ سہو واجب ہوگا یا نماز فاسد ہوجائے گی اور دہرانا ہوگی؟
جواب: واضح رہے کہ نماز میں سورۃ الفاتحہ کا پڑھنا واجب ہے، اور واجب اگر بھولے سے چھوٹ جائے، تو سجدۂ سہو واجب ہوتا ہے، لہذا اگر عیدالفطر یا عید الاضحیٰ کی نماز میں امام سورۃ الفاتحہ پڑھنا بھول جائے، تو اس سے نماز فاسد نہیں ہوگی، بلکہ سجدۂ سہو کرنے سے عیدین کی نماز ادا ہوجائے گی، تاہم اگر مجمع کی کثرت کی وجہ سے لوگوں کے تشویش میں مبتلا ہونے کا اندیشہ ہو، اس وجہ سے اگر سجدۂ سہو چھوڑ دیا جائے، تب بھی نماز ادا ہو جائے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
الھندیۃ: (126/1، ط: دار الفکر)
ولا يجب السجود إلا بترك واجب أو تأخيره أو تأخير ركن أو تقديمه أو تكراره أو تغيير واجب۔
و فیھا ایضا: (128/1، ط: دار الفکر)
أن مشايخنا قالوا لا يسجد للسهو في العيدين والجمعة؛ لئلا يقع الناس في فتنة، كذا في المضمرات ناقلا عن المحيط.
واللہ تعالٰی اعلم بالصواب
دارالافتاء الاخلاص،کراچی