عنوان: بغیر ولی کفو میں کیےنکاح اوراس کے بعد تین طلا قوں کا شرعی حکم

سوال: ایک عاقلہ بالغہ لڑکی نے اپنے ولی کی اجازت کے بغیر خفیہ طور پر ایک لڑکے سے نکاح کیا، اور یہ نکاح کفو (برابری) میں ہوا تھا۔ نکاح کے بعد میاں بیوی کے درمیان خلوتِ صحیحہ اور حقوقِ زوجیت (ہم بستری) بھی ادا ہوئے، یعنی عورت مدخول بہا تھی۔ کچھ عرصے بعد اختلافات کی بنا پر شوہر نے درج ذیل طریقے سے طلاقیں دیں: (۱) پہلے شوہر نے اپنے پورے ہوش وحواس میں فون پر تین طلاقیں دیں۔ (۲) دو دن بعد وائس میسج میں دوبارہ تین طلاقیں دیں۔ (۳) تقریباً ایک ماہ بعد دونوں نے تنہائی میں زبانی طور پر آپس میں صلح کر لی، شوہر نے معافی مانگی اور ایک ماہ تک لڑکی کے گھر رہ کر ازدواجی تعلقات بھی قائم کیے۔ (۴) اس واقعے کے چھ ماہ بعد شوہر نے دوبارہ فون پر تین طلاقیں دیں۔
اب شوہر کو سنن ابی داؤد اور جامع ترمذی کی حدیث (جس عورت نے اپنے ولی کی اجازت کے بغیر نکاح کیا، اس کا نکاح باطل ہے) ملی ہے، جس کی بنیاد پر وہ یہ گمان کر رہا ہے کہ چونکہ پہلا نکاح ہی باطل تھا، اس لیے دی گئی طلاقیں واقع نہیں ہوئیں۔ لہٰذا وہ اپنے گناہوں سے توبہ کرکے، اب ایک برسرِ روزگار اور نیک شخص کی حیثیت سے اسی لڑکی کے ساتھ اس کے ولی کی مکمل رضامندی، نئے مہر اور گواہوں کی موجودگی میں ازسرِ نو نکاح کرنا چاہتا ہے۔
دریافت طلب امر یہ ہے کہ:
۱) کیا مذکورہ حدیث کی روشنی میں پہلا نکاح باطل قرار پائے گا اور دی گئی طلاقیں غیر مؤثر شمار ہوں گی؟
۲) کیا حلالہ شرعیہ کے بغیر لڑکی کے ولی کی اجازت، نئے مہر اور نئے گواہوں کے ساتھ ان دونوں کا دوبارہ نکاح کرنا شرعاً جائز ہے؟

جواب: فقہِ حنفی کی رو سے اگر کوئی عاقلہ بالغہ لڑکی اپنا نکاح کفو (ہم پلہ/برابری) میں خود کر لیتی ہے تو وہ نکاح شرعاً مکمل طور پر منعقد اور درست ہو جاتا ہے، خواہ اس میں ولی کی اجازت شامل ہو یا نہ ہو۔ سائل نے سنن ابی داؤد اور جامع ترمذی کی جس حدیثِ مبارکہ (أَيُّمَا امْرَأَةٍ نُكِحَتْ بِغَيْرِ إِذْنِ وَلِيِّهَا، فَنِكَاحُهَا بَاطِلٌ) کا حوالہ دیا ہے، ائمہ احناف اور فقہاءِ کرام کی تشریح کے مطابق یہ حدیث ان عورتوں پر محمول ہے جو نابالغ ہوں یامجنونہ ہوں، جبکہ بالغہ اور عاقلہ عورت کا کفو میں کیا گیا نکاح بالکل صحیح اور نافذ ہے، اس حدیث کی اوربھی توجیہات ہیں ، لہٰذا پوچھی گئی صورت میں پہلا نکاح شرعاً منعقد ہو چکا تھا اور دونوں شرعی طور پر میاں بیوی تھے۔
چونکہ نکاح شرعاً درست تھا، اس لیے شوہر کو طلاق دینے کا اختیار حاصل تھا اور جب شوہر نے پہلی مرتبہ ہی فون پر صریح الفاظ میں ایک ساتھ تین طلاقیں دے دیں تو اسی وقت عورت پر تین طلاقِ مغلّظہ واقع ہو گئیں اور نکاح کا رشتہ فوری اور حتمی طور پر ختم ہو گیا۔
تین طلاقیں واقع ہونے کے بعد میاں بیوی کا رشتہ مکمل طور پر منقطع ہو جاتا ہے اور رجوع کا کوئی شرعی حق باقی نہیں رہتا، لہٰذا ایک ماہ بعد کی گئی زبانی صلح اور اس کے بعد قائم کیے گئے ازدواجی تعلّقات (ہم بستری) شرعاً ناجائز اور سخت گناہ تھے، جن پر دونوں کے لیے سچی توبہ اور استغفار لازم ہے، نیز چونکہ پہلی ہی مرتبہ میں تین طلاقیں واقع ہو کر عورت مکمل اجنبیہ ہو چکی تھی، اس لیے بعد میں وائس میسج یا چھ ماہ بعد دی جانے والی مزید طلاقیں لغو اور غیر مؤثر ہیں اور ان سے پہلے سے واقع شدہ تین طلاقوں کے حکم میں کوئی تبدیلی نہیں آتی۔
شوہر کا احادیثِ مبارکہ سے براہِ راست اور خود ساختہ استدلال کر کے طلاقوں کو غیر مؤثر سمجھنا فقہِ اسلامی کے اصولوں کے خلاف اور درست نہیں، کیونکہ تین طلاقِ مغلّظہ واقع ہو جانے کے بعد یہ دونوں ایک دوسرے کے لیے قطعی طور پر حرام ہو چکے ہیں، لہٰذا محض توبہ کر لینے، ملازمت یا روزگار اختیار کر لینے، ولی کو راضی کر لینے یا نیا مہر مقرر کر دینے سے یہ حرمت ختم نہیں ہوگی، بلکہ ان دونوں کا آپس میں نکاح صرف اسی صورت میں ممکن ہے کہ عورت عدت گزارنے کے بعد اپنی مرضی سے کسی دوسرے مرد سے باقاعدہ اور مستقل نکاح کرے، اس دوسرے شوہر سے ازدواجی تعلق قائم ہو، پھر وہ دوسرا شوہر بغیر کسی پیشگی شرط کے اپنی مرضی سے طلاق دے دے یا وفات پا جائے، اور اس کے بعد عورت اس دوسرے شوہر کی عدت بھی مکمل کر لے، تب جا کر وہ پہلے شوہر کے لیے حلال ہوگی اور اس سے نیا نکاح کر سکے گی۔ اب آپ کے سوالات کے مختصرجوابات درج ذیل ہیں :
جواب ۱: جی نہیں، فقہ حنفی کی رو سے عاقلہ بالغہ لڑکی کا اپنے کفو (برابری) میں کیا گیا پہلا نکاح شرعاً بالکل درست اور منعقد تھا۔ مذکورحدیث کا وہ مطلب نہیں جو شوہرلے رہا ہے، لہٰذا اس نکاح کو باطل سمجھنا غلط ہے اور شوہر کی جانب سے دی گئی تینوں طلاقیں مکمل طور پر واقع اور مؤثر ہو چکی ہیں۔
جواب ۲: جی نہیں، چونکہ تین طلاقِ مغلظہ واقع ہو چکی ہیں، اس لیے یہ دونوں ایک دوسرے کے لیے قطعی حرام ہو چکے ہیں۔ دوسرے نکاح کی شرائط پوری کیے بغیر محض ولی کی اجازت، نئے مہر اور نئے گواہوں کی بنیاد پر ان کا آپس میں دوبارہ نکاح کرنا شرعاً ہرگز جائز اور حلال نہیں ہے۔