سوال: مفتی صاحب ! اگر مرحوم والد نے اپنے کسی رشتہ دار سے دھوکہ کھانے کے بعد یہ کہا ہو کہ اب ان کے ساتھ کوئی تعلق نہیں رکھیں گے، کیونکہ انہوں نے پہلے بھی ان سے دھوکہ کھایا تھا۔
اب اگر ان کے ہاں اپنے کسی رشتہ دار سے شادی ہو اور وہ یہ چاہتے ہوں کہ والدہ اور بچے شادی میں شریک ہوں، والدہ مرحوم والد کی یادوں اور ان کو پہنچے دکھ کی وجہ سے نہ جانا چاہیں اور دل سے چاہیں کہ بچے بھی نہ جائیں تو کیا ایسی صورت میں بوڑھی والدہ کا دل دکھا کر شادی میں صرف اس لیے جائیں کہ رشتہ داروں سے قطع تعلقی درست نہیں، کیا والدہ سے بڑھ کر بھی رشتہ دار ہوتے ہیں؟
وہ تو بس اپنے مرحوم شوہر کو دیے دکھ درد کی وجہ سے نہیں جانا چاہتیں اور بچے انہیں منانا چاہتے ہیں، والدہ بچوں کے اصرار پے شاید چلی تو جائیں، لیکن مجبور ہو کر دل سے نہیں، کیونکہ اب شوہر تو ہے نہیں اور بچوں کا ہی سہارا ہے، کیا بچوں کا ایسا کرنا درست ہے کہ والدہ کو ٹینشن دیں اور انہیں ڈیپریشن میں ڈالیں؟

جواب: اسلام نے ہمیں رشتہ داروں کے ساتھ احسان اور اچھے برتاؤ کرنے کا حکم دیا ہے، رشتہ ناطہ کو توڑدینا اور رشتہ داری کا پاس ولحاظ نہ کرنا اللہ کے نزدیک حد درجہ ناپسندیدہ ہے۔
چنانچہ رسول اللہ ﷺ نے فرمایا:
لا يدخلُ الجنةَ قاطعُ رحمٍ
(صحيح مسلم:2556)
ترجمہ: جنت میں رشتہ توڑنے اور کاٹنے والا نہ جائے گا۔
اسی طرح رسول كريم صلى اللہ عليہ وسلم نے فرمايا ہے:
 "لَا طَاعَةَ لِمَخْلُوقٍ فِي مَعْصِيَةِ الْخَالِقِ" 
(المعجم الکبیر للطبرانی:185/18،ط:مکتبہ ابن تیمیہ،قاہرہ)
ترجمہ:" اللہ خالق كى نافرمانى ميں كسى مخلوق كى اطاعت و فرمانبردارى نہيں كى جا سكتى "
اس ليے والدہ كو حق نہيں، وہ اولاد كو اپنے رشتہ داروں سے شرعى حدود اور مصلحت كے اندر رہتے ہوئے ملنے اور صلہ رحمى كرنے سے روكیں، لہذا  آپ اپنی والدہ کو رشتہ داروں سے صلہ رحمى كرنے كى ترغيب دیں اور کوئی ایسی صورت اپنائیں کہ آپکی والدہ بھی خوش رہیں اور رشتے داروں سے ناطہ بھی نہ ٹوٹے۔