عنوان: چاروں مکاتبِ فکر کے نزدیک ایک مجلس میں دی گئی تین طلاقوں کا حکم

سوال: مفتی صاحب! گزارش ہے کہ شریعتِ اسلامیہ اور اہلِ حدیث مکتبِ فکر کی روشنی میں ہمارے ایک مسئلے کا شرعی حل اور تحریری فتویٰ جاری فرما دیں۔
پچھلے سال (اکتوبر یا نومبر کے مہینے میں) میرا اپنی بیوی کے ساتھ سخت جھگڑا ہوا اور غصے کی حالت میں میں نے فون (کال) پر اپنی بیوی کو یہ الفاظ کہے: "میری طرف سے تمہیں طلاق، طلاق، طلاق ہے"۔
الفاظ ادا کرنے کے فوراً بعد ہی کچھ ہی دیر میں میرا غصہ بالکل ٹھنڈا ہو گیا اور مجھے اپنے کیے پر سخت پچھتاوا ہوا، چنانچہ، ہم نے اسی وقت یعنی طلاق کے فوراً بعد عدت کے اندر ہی دوبارہ میاں بیوی کی طرح ساتھ رہنا شروع کر دیا اور ہمارے درمیان میاں بیوی والے تعلقات قائم ہو گئے۔ اس واقعے کو اب تقریباً 8 سے 9 ماہ گزر چکے ہیں اور ہم اس دوران مسلسل میاں بیوی کی طرح ساتھ رہ رہے ہیں، اس واقعے کے بعد سے اب تک میں نے دوبارہ کبھی طلاق کے الفاظ استعمال نہیں کیے۔
آپ سے درج ذیل سوالات کے جوابات مطلوب ہیں:
۱) اہلِ حدیث موقف کے مطابق کیا ایک ہی وقت (یا ایک ہی کال) پر دی گئی یہ تین طلاقیں ایک شمار ہوں گی؟
۲) چونکہ ہم طلاق کے فوراً بعد عدت کے اندر ہی دوبارہ ساتھ رہنے لگ گئے تھے تو کیا ہمارا رجوع شرعاً صحیح ہو گیا تھا؟
۳) کیا ہمارا موجودہ نکاح برقرار ہے اور ہمارا میاں بیوی کی حیثیت سے ساتھ رہنا شرعاً حلال ہے؟
برائے مہربانی اس معاملے کا تحریری فتویٰ جاری فرما کر شکریہ کا موقع دیں۔

جواب: واضح رہے کہ ایک ہی مجلس میں دی گئی تین طلاقیں شریعت کی نظر میں تین ہی واقع ہوتی ہیں اور اس کے بعد بیوی اپنے شوہر پر حرام ہو جاتی ہے، یہی حکم قرآن کریم اور احادیث نبویہ سے ثابت ہے اور اسی پر جمہور صحابہؓ رضوان اللہ علیہم اجمعین و تابعین کا اجماع اور ائمہ اربعہ رحمہم اللہ تعالی کا بالاتفاق یہی مسلک ہے، جو حضرات بعض دیگر احادیث سے استدلال کرتے ہوئے ایک مجلس کی تین طلاقوں کو ایک قرار دیتے ہیں، جمہورِ امّت کے نزدیک ان کا استدلال صحیح مفہوم پر مبنی نہیں، کیونکہ وہ ان روایات کا ایسا مفہوم لیتے ہیں جو قرآنِ کریم، کثیر احادیث، آثارِ صحابہ اور جمہورِ امّت کے مسلک کے خلاف ہے۔
لہٰذا راجح اور مفتیٰ بہ قول یہی ہے کہ ایک مجلس کی تین طلاقیں تین ہی واقع ہوتی ہیں اور تین طلاقیں واقع ہونے کے بعد نکاح فوراً ختم ہو جاتا ہے، میاں بیوی ایک دوسرے پر حرمتِ مغلّظہ کے ساتھ حرام ہو جاتے ہیں، رجوع اور نئے نکاح کا حق باقی نہیں رہتا۔ دوبارہ نکاح اسی وقت ممکن ہے کہ جب عورت پہلے شوہر کی عدت گزار کر کسی اور مرد سے نکاح کرے، اور اس سے ازدواجی تعلقات قائم کرے، پھر وہ اسے طلاق دیدے یا اس کا انتقال ہو جائے تو عورت عدت گزار کر پہلے شوہر سے نکاح کرسکتی ہے۔
1/3) اس تمہید کی روشنی میں چونکہ آپ نے اپنی اہلیہ کو تین طلاقیں دے دی ہیں، اس لیے شرعی اعتبار سے تینوں طلاقیں واقع ہو چکی ہیں اور آپ دونوں کا نکاح ختم ہو گیا ہے، اب نہ رجوع کی کوئی گنجائش باقی رہی ہے اور نہ ہی باہمی رضامندی سے دوبارہ نکاح کیا جا سکتا ہے۔

نیز تین طلاقیں واقع ہونے کے بعد آپ دونوں کے درمیان جو میاں بیوی والے تعلقات قائم ہوئے، وہ شرعاً ناجائز تھے، لہٰذا آپ دونوں پر لازم ہے کہ اللہ تعالیٰ کے حضور سچے دل سے توبہ و استغفار کریں اور فوراً علیحدہ ہوجائیں۔