سوال: کیا فرماتے ہیں مفتیان عظام ایسے شخص کے بارے میں کہ جس نے آٹھ سال سے بیوی کے ساتھ ضداً ازدواجی تعلقات قائم نہیں رکھا، حالانکہ اسی کمرے میں سوتا ہے، لیکن بیوی سے نہ ازدواجی تعلقات رکھتا ہے اور نہ ہی بیوی کو طلاق و خلع دے کر علیحدہ کررہا ہے اور بیوی بیچاری پریشان کن زندگی گزار رہی ہے۔ شریعت میں ایسے شخص کے متعلق کیا حکم ہے؟ کیا حقوق زوجیت ادا نہ کرنے کی وجہ سے عورت کو فسخ نکاح کرانے کا حق ہے؟ یہ بھی واضح رہے کہ ان کی ایک بیٹی بھی ہے۔ (۲) جن جن لوگوں کو یہ معلوم ہے، لیکن وہ پھر بھی لڑکے کو نہ سمجھائیں تو ایسے لوگوں سے متعلق شریعت کیا حکم دیتی ہے؟ (۳) کیا ایسے لوگوں سے ان کی ظلم کی وجہ سے اور ان کی اصلاح کی خاطر برادری والے بائیکاٹ کرسکتے ہیں؟

جواب: واضح ہو کہ شوہر کی طرف سے ازدواجی تعلق قائم نہ رکھنا اس وقت فسخ نکاح کا سبب بنتا ہے، جبکہ شوہر نے شادی کے بعد سے اب تک ایک مرتبہ بھی عنین (نامرد) ہونے کی وجہ سے حقوقِ زوجیت ادا نہ کیا ہو، لیکن اگر ایک مرتبہ بھی حقوقِ زوجیت ادا کیا ہو، تو پھر صرف ازدواجی تعلق قائم نہ رکھنے سے عورت کو فسخِ نکاح کرانے کا حق حاصل نہیں ہوتا، البتہ شوہر ضداً حقوقِ زوجیت ادا نہ کرنے کی وجہ سے سخت گنہگار ہوگا، لہٰذا صورتِ مسئولہ میں شوہر ایک مرتبہ حقوقِ زوجیت ادا کرچکا ہے، جس کے نتیجے میں بیٹی پیدا ہوئی ہے۔ اب مزید حقوق زوجیت ادا نہ کرنے کی وجہ سے عورت کو فسخِ نکاح کا حق حاصل نہیں ہے، لیکن شوہر آٹھ سال سے حقوقِ زوجیت ادا نہ کرنے کی وجہ سے سخت گنہگار ہوگا۔
(۲) جو لوگ جانتے ہوئے لڑکے کو نہیں سمجھارہے، وہ سب بھی اس گناہ میں شریک ہونے کی وجہ سے گنہگار ہیں۔
(۳) احباب و اقارب کو چاہیے کہ انہیں سمجھائیں، اگر وہ باز نہ آئے، تو ایسے لوگوں سے دوستانہ تعلقات نہ رکھنے کی بھی گنجائش ہے۔ اگر کوئی شرعی قاضی ہو، تو وہ ایسے لوگوں کو تعزیراً سزا بھی دے سکتا ہے۔