سوال: آج کل ایک وائس میسیج چل رہا ہے، جس میں ایک مولوی صاحب اپنے مریدین کو حدیث سے وتر کی نماز کے بعد ایک عمل کرنے کو بتا رہے ہیں کہ "وتر کی نماز پڑھنے کے بعد دو سجدے کرنے ہیں، پہلے میں ’’سبوح قدوس رب الملآئکة والروح‘‘ پانچ مرتبہ پڑھ کر جلسہ کرنا ہے اور آیت الکرسی ایک مرتبہ پڑھ کر دوبارہ سجدہ میں ’’سبوح قدوس رب الملآئکة والروح‘‘پانچ مرتبہ پڑھنا ہے" یہ وظیفہ آپ ﷺ نے فاطمہ رضی اللہ عنہا کو بتایا ہے۔
اس کے فضائل میں ہے کہ جگہ سے اٹھنے سے پہلے اللہ اس کی مغفرت فرماتے ہیں، اور اس کو سو حج، سو عمرے اور سو شہیدوں کا ثواب عطا فرماتے ہیں، ہزا ر فرشتے نازل کرتے ہیں، جو اس کے لیے نیکیاں لکھتے ہیں اور ساٹھ بندوں کی سفارش کا اللہ حکم فرمائیں گے۔
معلوم یہ کرنا ہے کہ کیا یہ کسی حدیث صحیح ہے اور اس پر عمل کرنے پر واقعی اتنا ثواب ملے گا؟

جواب: "عن النبى صلى الله عليه وسلم أنه قال لفاطمة رضي الله عنها: ما من مؤمن ولا مؤمنة يسجد بعد الوتر سجدتين يقول في سجوده خمس مرات: "سبوح قدوس رب الملائكة والروح"، ثم يرفع رأسه ويقرأ اٰية الكرسي مرةً، ثم يسجد ويقول فى سجوده خمس مرات: "سبوح قدوس رب الملائكة والروح"، والذي نفس محمد بيده أنه لايقوم من مقامك حتى يغفر له وأعطاه ثواب مائة حجةٍ ومائة عمرةٍ، وأعطاه الله ثواب الشهداء، وبعث الله إليه ألف ملك يكتبون له الحسنات، وكأنما أعتق مائة رقبة، واستجاب الله تعالى دعائه، ويشفع يوم القيامة في ستين من أهل النار‘‘.
مذکورہ روایت اور فضیلت کسی حدیث سے ثابت نہیں ہے، محدثین عظام اور فقہاء کرام رحمھم اللہ نے اس کے من گھڑت ہونے کا حکم لگایا ہے، لہذا اس روایت کو بیان کرنا اور پھیلانا جائز نہیں، ان کلمات کے اتنے فضائل کسی حدیث سے ثابت نہیں، البتہ کلمات “سبوح قدوس رب الملائكة والروح'” کا پڑھنا درست ہے، اور نبی کریم صلى اللہ علیہ والہ وسلم سے ثابت ہے۔