سوال: مسند احمد میں ہے: حضرت عقبہ بن عامر رضی اللہ تعالیٰ عنہ فرماتے ہیں کہ ایک روز میری رسول اللہﷺ سے ملاقات ہوئی، میں نے جلدی سے آپ کا ہاتھ تھام لیا اور کہا یا رسول اللہ ﷺ مومن کی نجات کس عمل پر ہے؟ آپﷺ نے فرمایا: اے عقبہ ! زبان تھامے رکھ، اپنے گھر میں ہی بیٹھا رہا کر اور اپنی خطاؤں پر روتا رہ، پھر دوبارہ جب حضور ﷺ سے میری ملاقات ہوئی تو آپ نے خود میرا ہاتھ پکڑ لیا اور فرمایا: عقبہ! کیا میں تمہیں تورات، انجیل، زبور اور قرآن پاک میں اتری ہوئی تمام سورتوں سے بہترین سورتیں بتاؤں؟ میں نے کہا: جی ہاں! حضور ﷺ ضرور ارشاد فرمایئے، اللہ تعالیٰ مجھے آپ پر فدا کرے، پس آپ ﷺ نے مجھے اعوذ برب الفلق اور اعوذ برب الناس پڑھائیں، پھر فرمایا: دیکھو عقبہ! انہیں نہ بھولنا اور ہر رات انہیں پڑھ لیا کرنا۔
عقبہ فرماتے ہیں کہ پھر نہ میں انہیں بھولا اور نہ کوئی رات ان کے پڑھے بغیر گزاری، میں نے پھر آپ سے ملاقات کی اور جلدی کر کے آپ کے دست مبارک کو اپنے ہاتھ میں لے کرعرض کیا کہ یا رسول اللہ ﷺ! مجھے بہترین اعمال کا ارشاد فرمایئے، آپ ﷺ نے فرمایا: سن جو تجھ سے توڑے تو اس سے جوڑ، جو تجھے محروم رکھے تو اسے دے، جو تجھ پر ظلم کرے تو اس سے درگزر کر اور معاف کر دے"۔

جواب: سوال میں ذکرکردہ روایت ’’حسن ‘‘ درجے کی ہے ، لہذا اس کو بیان کیا جاسکتا ہے۔اس روایت کا ترجمہ،تخریج اور اسنادی حیثیت مندرجہ ذیل ہے:
ترجمہ:سیدنا عقبہ بن عامر جہنی رضی اللہ عنہ سے مروی ہے کہ ایک مرتبہ میری ملاقات نبی کریم ﷺ سے ہوئی تو میں نے آگے بڑھ کر نبی کریم ﷺ کا دست مبارک تھام لیا اور عرض کیا : یا رسول اللہ ! ﷺ مومن کی نجات کس طرح ہوگی؟نبی کریم ﷺ نے فرمایا : اے عقبہ ! اپنی زبان کی حفاظت کرو اپنے گھر کو اپنےلیے کافی سمجھو اور اپنے گناہوں پر آہ و بکاء کرو۔
کچھ عرصہ بعد دوبارہ ملاقات ہوئی، اس مرتبہ نبی کریم ﷺنے آگے بڑھ کر میرا ہاتھ پکڑ لیا اور فرمایا : اے عقبہ بن عامر! کیا میں تمہیں تورات، زبور، انجیل اور قرآن کی تین سب سے بہتر سورتیں نہ بتاؤں ؟
میں نے عرض کیا کہ اللہ مجھے آپ پر نثار کرے، کیوں نہیں ! چنانچہ نبی کریم ﷺنے مجھے سورت اخلاص، سورت فلق اور سورت ناس پڑھائیں اور فرمایا عقبہ ! انہیں مت بھلانا اور کوئی رات ایسی نہ گذارنا جس میں یہ سورتیں نہ پڑھو،چنانچہ میں نے اس وقت سے انہیں کبھی بھولنے نہیں دیا اور کوئی رات انہیں پڑھے بغیر نہیں گذاری ۔کچھ عرصے بعد پھر ملاقات ہوئی تو میں نے آگے بڑھ کر نبی کریم ﷺکا دست مبارک تھام لیا اور عرض کیا : یا رسول اللہ ! ﷺمجھے سب سے افضل اعمال کے بارے میں بتائیے؟نبی کریم ﷺنے فرمایا : عقبہ ! رشتہ توڑنے والے سے رشتہ جوڑو، محروم رکھنے والے کو عطاء کرو اور ظالم سے درگذر اور اعراض کرو۔( مسند احمد، حدیث نمبر: 17334، ط: مؤسسة الرسالة )
تخریج الحدیث:
۱۔امام أحمد بن حنبل (م241 ھ)نے ’’مسندأحمد‘‘(28/570)،رقم الحدیث: 17334، اور(28/654) ،رقم الحدیث: 17452، ط: مؤسسة الرسالة )میں ذکر کیا ہے۔
۲ ۔حافظ ابوبکر بن ہارون رویانی(م307ھ)نے’’مسند الرویانی‘‘(1/146،رقم الحديث:157،ط:مؤسسة قرطبة) میں ذکر کیا ہے۔
۳۔علامہ ابن عساکر(م571ھ)نے’’تاریخ دمشق‘‘(40/496،رقم الحديث: 5 816،ط:دارالفكر)میں ذکر کیا ہے۔
مذكوره اسنادی حیثیت:
علامہ ہیثمی (م807ھ)فرماتے ہیں :اس کو امام احمد نے روایت کیا ہے اور اس کے رجال ثقات ہیں۔
محقق دکتور علامہ شعیب ارنؤوط(م 1438ھ) نے اس کی سند پر حسن کا حکم لگایا ہے۔