سوال: السلام علیکم،
مفتی صاحب ! ایک بندہ تبلیغ میں چار مہینے کے لیے گھر سے نکلا، رائیونڈ مرکز سینکڑوں میل دور ہے، اس سے متعلق چند سوالات کے جوابات درکار ہیں:
(1) رائیونڈ جاتے وقت اپنے شہر سے نکل کر نمازِ قصر کب شروع کرے گا؟
(2) اپنے شہر کے حدود کا تعین کیسے ہوگا؟
(3) رائیونڈ میں نماز قصر ادا کرے گا؟
(4) رائیونڈ سے 35 دن تشکیل میں نماز قصر ادا کرے گا؟
(5) رائیونڈ سے 12 دن تشکیل میں نماز قصر ادا کرے گا؟
(6) رائیونڈ سے یا مقام تشکیل سے اپنے گھر واپس جاتے ہوئے راستے میں نماز قصر ادا کرے گا؟

جواب: (1,2,3) جو شخص اپنے شہر یا علاقے سے باہر سفر کے ارادے سے نکلے، اور مسافتِ سفر اڑتالیس میل یا 77.24 کلو میٹر، یا اس سے زائد ہو، تو ایسے شخص پر اپنے شہر کی آبادی اور حدود سے نکلنے کے بعد چار رکعت والی فرض نماز میں قصر کرنا لازم ہوجاتا ہے، اور جس جگہ سفر کا ارادہ ہو، اس شہر یا بستی میں پندرہ دن یا اس سے زیادہ ٹھہرنے کا ارادہ نہ ہو، تو وہاں بھی قصر نماز پڑھنا لازم ہوگا۔
(4,5) اگر جماعت کی تشکیل کسی شہر یا بڑے گاؤں یا بستی میں 15 دن یا اس سے زائد کی ہو، اور اس علاقے کی کئی مساجد میں جانا ہو، تو اس شہر یا بستی میں وہ جماعت مقیم کہلائے گی، اور پوری نماز پڑھیں گے۔ اور اگر کئی بستیوں میں تشکیل ہو، اور ہر تین دن بعد یا کچھ دن بعد بستی تبدیل کرکے دوسری بستی یا گاؤں میں جانا پڑتا ہو، جس کا نام وغیرہ بھی الگ ہو، اور مقامی حضرات کے ہاں بھی وہ بستی بالکل علیحدہ شمار ہوتی ہو، تو اس صورت میں چوں کہ جماعت ایک مقام پر 15 دن سے کم ٹھہر رہی ہے، لہذا جماعت مسافر کہلائے گی اور اس صورت میں وہ قصر نماز پڑھیں گے۔
(6) مسافر جب تک اپنے وطنِ اصلی ( جہاں اس کی رہائش ہے) کی آبادی کی حدود میں داخل نہیں ہوجاتا، اس وقت تک قصر نماز ہی ادا کرے گا۔