عنوان: کئی سال بعد ترکہ تقسیم کرنے، وراثتی زمین کے حصوں اور بہنوں کو ان کا شرعی حق دینے کا حکم

سوال: حضرت میرا سوال یہ ہے کہ ہمارے والد صاحب 1999 میں وفات پا گئے تھے، وہ اپنے ترکے میں ایک گھر جس میں ہم رہتے تھے اور کچھ پہاڑی زمین (جو ناپ کے حساب سے نہیں ہو سکتی پہاڑی ایریا میں اوپر نیچے ہوتی ہے) جو کہ ابھی کچھ دن پہلے ہمارے حصہ میں آئی ہے، ہم 4 بھائی 2 بہنیں اور والدہ ہیں۔
آپ سے اس معاملے میں تین چیزوں کی بارے میں پوچھنا تھا
1) جو گھر ہے اس کی اگر قیمت لگائیں تو 1999 کے ٹائم کی لگائیں گے یا جب ہم نے اپنی دو بہنوں کا حصہ نکالنا ہے اس وقت کی لگائیں گے؟
2) جو تھوڑی بہت زمیںن ہمارے دادا کی طرف سے والد صاحب کے حصہ میں آئی ہے، اس میں سے ہم سب کو کتنا کتنا حصہ آئے گا؟
3) کیا ہم کو اپنی بہنوں کو حصہ دینا ضروری ہے یا ان کی جگہ کچھ پیسے ادا کر دیں یا اگر وہ زمین میں سے حصہ معاف کرنا چاہیں اور مکان میں سے لینا چاہیں تو ایسا بھی کر سکتی ہیں؟
جزاک اللہ

جواب: 1) کسی شخص کے انتقال کے کئی سال بعد اس کی جائیداد تقسیم کی جائے تو جائیداد کی قیمت لگاتے وقت تقسیم کے وقت کی موجودہ مارکیٹ ویلیو کا اعتبار کیا جائے گا، لہٰذا جس وقت ورثاء میں جائیداد تقسیم کی جائے گی، اس وقت کی مارکیٹ ویلیو کے مطابق جائیداد کی قیمت متعین کرکے ہر وارث کو اس کا شرعی حصہ دیا جائے گا۔
2) اگر آپ کے دادا نے اپنی زندگی میں مالکانہ تصرّف کے ساتھ وہ زمین آپ کے والد کو دے دی تھی یا آپ کے دادا کے انتقال کے بعد آپ کے والد کو ترکہ میں ملی تھی تو یہ زمین بھی آپ کے والد کے ترکہ میں شمار ہوگی اور ان کے انتقال کے بعد ان کے شرعی ورثاء میں شریعت کے قانونِ میراث کے مطابق تقسیم ہوگی۔
3) جی ہاں! بہنوں کو ان کا شرعی حصہ دینا ضروری ہے، ان کی رضامندی کے بغیر ان کا حصہ روکنا یا کم کرنا جائز نہیں، البتہ اگر بہنیں بالغ اور سمجھ دار ہوں اور اپنی خوشی و رضامندی سے اپنے شرعی حصے کے بدلے رقم لینا چاہیں یا زمین کے بجائے مکان میں اپنا حصہ لینا چاہیں تو باہمی رضامندی سے ایسا کیا جاسکتا ہے، لیکن اپنے حصہ پر قبضہ کیے بغیر کسی کے حق میں دستبردار یا اپنا حصہ معاف نہیں کرسکتی ہیں۔
واضح رہے کہ خاندانی یا معاشرتی دباؤ کی وجہ سے کسی وارث سے اس کا حصہ معاف کروا لینا، جیسا کہ ہمارے ہاں بعض علاقوں میں معاشرتی اور خاندانی دباؤ کی وجہ سے بہنیں اپنا حصہ بھائیوں کو معاف کر دیتی ہیں، ایسا کرنا شرعاً جائز نہیں ہے، لہذا بہنوں کے جبری طور پر معاف کرنے کے باوجود وہ حصہ ان کی ملیکت میں برقرار رہے گا، بھائیوں کا اس پر قبضہ کرنا شرعاً حرام اور ظلم شمار ہوگا۔