عنوان: والد کی وفات کے بعد زرعی زمین، پلاٹ اور مکان میں بہنوں کے شرعی حق اور ترکہ کی آمدنی کی تقسیم کا حکم

سوال: السلام علیکم، ہم چھ بہنیں اور تین بھائی ہیں، ہمارے والد صاحب کا چھ سال پہلے انتقال ہو گیا تھا، والد صاحب اپنی وراثت میں کچھ زرعی زمین، ایک پلاٹ اور ایک گھر چھوڑ گئے ہیں جس میں والدہ اور بھائی مقیم ہیں، شرعاً تو والد کے انتقال کے فوراً بعد جائیداد کی تقسیم ہو جانی چاہیے تھی، بھائی نے زمینوں کا بٹوارہ کر کے تمام بہن بھائیوں کے نام چڑھا دی ہیں لیکن ہمیں بہنوں کو نہیں پتہ کہ وہ زمینیں کہاں ہیں؟ تمام زمینوں کے معاملات ہمارا منجھلا بھائی دیکھتا ہے، وہ کہتا ہے زمینیں ہاتھ بٹائی پر دی ہوئی ہیں جس سے وہ ہر بہن کو تھوڑا تھوڑا کر کے سالانہ 150000 دیتا ہے، جو پلاٹ ہے وہ بھی ایسے ہی پڑا ہے، جب ہم اسے بیچنے کا کہتے ہیں تو بڑا بھائی کہتا ہے میں نے فروخت کا بولا ہوا ہے لیکن کس کو اور کتنے میں، یہ ہمیں نہیں معلوم، اس کے علاوہ جس گھر میں والدہ اور بھائی مقیم ہیں اس میں ہم سب کا حصہ ہے، ہم سب بہنیں کسی نہ کسی ضرورت میں پھنسی ہوئی ہیں اور ہم والدہ اور بھائیوں کی ناراضگی مول نہیں لینا چاہتیں، اس لیے ہم چاہتی ہیں کہ اس پر شریعت کیا کہتی ہے، اس پر ایک فتویٰ چاہیے تاکہ آخرتکے معاملات کو دیکھ کر ہی ہمارے گھر والے کوئی فیصلہ لیں۔ والسلام

جواب: والد کے انتقال کے بعد ان کی زرعی زمین، پلاٹ اور مکان سمیت تمام ترکہ شرعی ورثاء کی ملکیت میں منتقل ہوگیا تھا، لہٰذا کسی ایک بھائی کو یہ حق حاصل نہیں کہ وہ تمام جائیداد کا انتظام اپنی مرضی سے کرے اور دوسرے ورثاء کو جائیداد کی مکمل تفصیل، آمدنی اور معاملات سے بے خبر رکھے۔
اگر زرعی زمین تمام ورثاء کے نام منتقل ہوچکی ہے تو ہر وارث اپنے شرعی حصے کا مالک ہے، زمین کو بٹائی پر دینا، اس کی آمدنی وصول کرنا اور اس آمدنی کو تقسیم کرنا تمام ورثاء کی رضامندی اور باہمی طے شدہ طریقے کے مطابق ہونا چاہیے۔ ہر بہن کو سالانہ 150,000 روپے دینا اسی وقت درست ہوگا جب یہ رقم اس کے شرعی حصے کے مطابق اس کی مکمل آمدنی ہو، محض اپنی طرف سے کوئی رقم مقرر کرکے دینا کافی نہیں۔
اسی طرح پلاٹ بھی تمام شرعی ورثاء کی مشترکہ ملکیت ہے، اسے فروخت کرنے یا اس کے متعلق کوئی فیصلہ کرنے کے لیے تمام بالغ ورثاء کی رضامندی ضروری ہے، کسی ایک بھائی کو یہ اختیار نہیں کہ وہ دوسرے ورثاء کی اجازت کے بغیر اسے اپنے پاس رکھے۔
رہا وہ گھر جس میں والدہ اور بھائی رہتے ہیں تو اگر وہ مکان مرحوم والد کی ملکیت تھا تو وہ بھی تمام شرعی ورثاء کا مشترکہ ترکہ ہے، والدہ اور بھائیوں کا اس میں رہنا بہنوں کے شرعی حصے کو ختم نہیں کرتا، البتہ اگر سب ورثاء باہمی رضامندی سے کسی کو رہنے کی اجازت دیں تو اس کی گنجائش ہے۔
لہٰذا بہنوں کا اپنے شرعی حصے کا مطالبہ کرنا قطع رحمی یا والدہ اور بھائیوں کی نافرمانی نہیں ہے، ہر وارث کو اپنے حقِ وراثت کے بارے میں معلومات حاصل کرنے اور اپنے حصے کا مطالبہ کرنے کا شرعی حق حاصل ہے۔
لہذا پوچھی گئی صورت میں بھائیوں اور والدہ پر شرعاً لازم ہے کہ مرحوم کا ترکہ شرعی اصولوں کے مطابق تقسیم کرکے ہر وارث کو اس کا مقررہ حصہ ادا کریں، بلا عذرِ شرعی وراثت کی تقسیم میں تاخیر کرنا یا کسی وارث کو اس کے حق سے محروم رکھنا جائز نہیں، جبکہ ورثاء کو اس کی ضرورت بھی ہے، اگر بھائی اور والدہ بلا عذرِ شرعی ترکہ تقسیم نہیں کرتے اور ورثاء کے حقوق روک کر رکھتے ہیں تو اس پر وہ گناہ گار ہوں گے۔
لہذا مناسب یہ ہے کہ انہیں حسنِ اخلاق اور حکمت کے ساتھ سمجھایا جائے کہ میراث کی بر وقت تقسیم (خصوصاً جب دیگر ورثاء اس کا مطالبہ کر رہے ہوں) شریعت کا حکم ہے، اور ہر حق دار کو اس کا شرعی حق ادا کرنا لازم ہے۔