عنوان: مرحومہ کی امانت میں رکھا ہوا سونا، وارث کے لیے وصیت اور ترکہ میں اس کی شرعی حیثیت

سوال: ہمارے پاس امانت پڑی ہوئی ہے، ہماری نانو نے میری والدہ کے پاس کچھ چیزیں امانت رکھوائی تھی ، اپنے بھائی کے لیے کہ جب تھوڑے سے اس کے حالات اس طرح ہوئے تو تم نے اس کو وہ امانت لوٹا دینی ہے، اس کی گولڈیہ تمہارے پاس امانت ہے ، میری نانو کو فوت ہوئے چار سال ہو گئے ہیں اور چار سالوں سے اس سونے کی زکوة بھی نہیں دی گئی اور ابھی تک وہ ہمارے پاس ہی پڑا ہوا ہے اور اب باقی جو بہن بھائی ہیں وہ کہہ رہے ہیں کہ ابھی بھی ان کو وہ گولڈ مت دیں کیونکہ اگر آپ دیں گے تو وہ کھا پی بیٹھیں گے، ختم کر دیں گے، ضائع کر دیں گے، پیسے کسی کو دے دیں گے، اس صورت میں کیا کیا جائے؟
اور یہ جو زکوة چار سالوں سے بن رہی ہے، مزید اگر ابھی ہم نہ دیں تو اس کا کیا طریقہ کار ہے؟ اور ہمیں وہ امانت ان کو دے دینی چاہیے یا نہیں دینی چاہیے؟ اس ڈر سے نہیں دے رہے کہ وہ کسی کو دے دیں گے یا ضائع کر دیں گے۔ ہاں، وہ ہیں اس طرح کے کہ پیسے ان کے ہاتھ میں آتے ہیں تو وہ خرچ کر دیتے ہیں، ضائع کر دیتے ہیں، لیکن دوسری طرف زندگی موت کا انسان کا نہیں پتہ ہوتا، اگر میری والدہ کے پاس امانت ہے تو اس کا پھر کیا کیا جائے؟ مجھے ذرا اسلام کی روح کے مطابق اس کا پراپر جواب دیں اور اگر کوئی فتویٰ سامنے ہے وہ بھی میرے ساتھ شیئر کریں۔
کیا یہ مال وراثت میں شمار نہیں ہوگا اور کیا مرنے والی کی وصیت اس کے ایک وارث کے حق قابل عمل ہوگی باقی ورثاء محروم کر دیئے جائیں گے؟ کیونکہ مرنے والی نے اپنی زندگی میں اپنا مال اپنے اس بیٹے کے حوالے نہیں کیا ہے۔

جواب: پوچھی گئی صورت میں مرحومہ نانو نے اپنی زندگی میں مذکورہ سونا اپنے بیٹے کے حوالے کرکے اس کی ملکیت نہیں بنایا تھا، بلکہ وہ سونا آپ کی والدہ کے پاس امانت کے طور پر رکھا تھا اور یہ کہا تھا کہ مناسب وقت پر اسے ان کے بھائی کو دے دینا۔ تو آپ کی والدہ صرف وکیل تھیں، اور وکالت موت سے ختم ہوگئی ہے۔ لہٰذا محض یہ کہہ دینا کہ ’’یہ سونا میرے بیٹے کو دے دینا‘‘، اس سے ملکیت ثابت نہیں ہوئی، اور مرحومہ کے انتقال کے وقت سونا بدستور انہی کی ملکیت میں تھا۔ اس لیے یہ سونا ان کے ترکہ میں شامل ہوگیا اور ان کے انتقال کے ساتھ ان کے تمام شرعی ورثاء اپنے اپنے حصوں کے حق دار ہوگئے۔
اگر مرحومہ کا مقصود یہ تھا کہ ان کے انتقال کے بعد یہ سونا ان کے ایک وارث، مثلاً بیٹے کو دے دیا جائے، تو یہ وصیت للوارث کے حکم میں ہوگا، اور فقہِ حنفی کے مطابق دوسرے بالغ اور عاقل ورثاء کی رضامندی کے بغیر ایسی وصیت نافذ نہیں ہوتی۔ حدیث میں ہے: «لا وصية لوارث» (سنن ابن ماجه، 2/906، دار إحياء الكتب العربية)، یعنی ’’وارث کے لیے وصیت نہیں۔‘‘ لہٰذا باقی ورثاء کو محروم کرکے صرف اس ایک بیٹے کو پورا سونا دے دینا شرعاً لازم نہیں، بلکہ اگر تمام شرعی ورثاء بالغ، عاقل اور اپنی خوشی سے اس وصیت کو منظور کریں تو وہ سونا اسی بیٹے کو دیا جاسکتا ہے، اور اگر بعض ورثاء اجازت دیں اور بعض نہ دیں تو صرف اجازت دینے والوں کے حصوں کی حد تک اس وصیت کو نافذ کیا جاسکتا ہے۔
نیز فقہی فتاویٰ میں بھی صراحت ہے کہ اگر کسی چیز کے ہبہ کے متعلق محض قول ہو اور موہوب لہ کو زندگی میں قبضہ نہ دیا گیا ہو تو ہبہ مکمل نہیں ہوتا اور وہ چیز مالک کے انتقال کے بعد اس کے ترکہ میں شامل ہوتی ہے۔ لہٰذا موجودہ صورت میں سونا آپ کی والدہ کے پاس امانت ہے، اسے محض اس خوف کی وجہ سے کہ متعلقہ بیٹا اسے ضائع کردے گا، ہمیشہ کے لیے روکنا درست نہیں؛ بلکہ پہلے مرحومہ کے تمام شرعی ورثاء متعین کرکے ان کے حصے معلوم کیے جائیں، پھر اگر وہ سب باہمی رضامندی سے مذکورہ بیٹے کو اس کا حصہ یا وصیت کے مطابق اپنے اپنے حصے سے زائد دینے پر راضی ہوں تو دے سکتے ہیں، ورنہ ہر وارث کو اس کا شرعی حق دیا جائے۔ البتہ اگر متعلقہ شخص مالی تصرف میں کمزور ہے تو اس کے اپنے شرعی حصے کو محفوظ طریقے سے، اس کی اجازت اور رضامندی کے ساتھ، خرچ کرنے یا محفوظ رکھنے کا انتظام کیا جاسکتا ہے، مگر محض اندیشے کی بنیاد پر اس کے شرعی حق کو روکنا جائز نہیں۔
باقی جہاں تک اس سونے پر گزشتہ چار سالوں کی زکوٰۃ کا تعلق ہے تو اس میں یہ تفصیل ہے کہ مالِ میراث تقسیم سے پہلے اگرچہ ورثاء کی ملکیت میں ہوتا ہے، لیکن جب تک باقاعدہ تقسیم نہ ہو، ہر وارث کا حصہ دینِ ضعیف کے حکم میں ہوتا ہے۔ اور دینِ ضعیف پر قبضہ سے پہلے زکوٰۃ واجب نہیں ہوتی۔ اس لیے ترکہ پر اس وقت تک زکوٰۃ واجب نہیں ہوتی جب تک اسے شرعی ورثاء کے درمیان ان کے حصص کے مطابق تقسیم نہ کردیا جائے، کیونکہ زکوٰۃ کے واجب ہونے کے لیے ضروری ہے کہ مال پر ملکیت کے ساتھ اس پر قبضہ بھی ہو۔ لہٰذا صورتِ مسئولہ میں تقسیم سے پہلے گزشتہ چار سال کی زکوٰۃ واجب نہیں ہوگی، البتہ تقسیم کے بعد جو وارث پہلے سے صاحبِ نصاب ہو، وہ اپنے دیگر اموال کے ساتھ اس مال کی بھی زکوٰۃ ادا کرے گا۔ جو وارث پہلے سے صاحبِ نصاب نہ ہو، تقسیم کے بعد اگر وہ صاحبِ نصاب ہوجائے اور اس پر مکمل سال بھی گزر جائے تو اس صورت میں اس پر زکوٰۃ واجب ہوگی۔
خلاصہ: چونکہ نانو نے اپنی زندگی میں سونا اپنے بیٹے کو مالک بناکر اس کے قبضے میں نہیں دیا تھا، اس لیے وہ سونا ان کی وفات کے بعد ترکہ ہے، اور محض ان کی خواہش یا وصیت کی وجہ سے باقی شرعی ورثاء کے حقوق ختم نہیں ہوسکتے۔ زکوٰۃ تقسیم سے قبل گزشتہ سالوں کی واجب نہیں ہوگی، اور جس وارث کی ملکیت میں جو حصہ آئے گا، اس کے حساب سے اس پر سابقہ سال یا نئے سال کے حساب سے زکوٰۃ واجب ہوگی۔