عنوان: مشترکہ رقم سے خریدے گئے مکان کی فروخت اور رقم کی شرعی تقسیم

سوال: السلام علیکم! ہماری والدہ کے نام پر ایک مکان اور ایک فلیٹ تھا، جنہیں فروخت کرکے 2002ء میں ایک نیا مکان خریدا گیا، اس وقت ہمارے والد صاحب کوئی کام نہیں کرتے تھے، اس لیے مکان کی خریداری میں ہماری والدہ اور ہم چار بھائیوں کی رقم شامل تھی، ہماری کوئی بہن نہیں ہے اور والد صاحب کا بھی انتقال ہوچکا ہے۔ 2002ء میں مذکورہ مکان 18,50,261 روپے میں خریدا گیا، جس میں درج ذیل افراد کی رقم شامل تھی:
والدہ: 11,60,451 روپے، رشید: 1,84,013 روپے، رفیق: 1,84,013 روپے، شاہد: 1,84,013 روپے جبکہ سلیم کی کوئی رقم شامل نہیں کی، مکان والدہ کے بیٹے رشید غلام نبی کے نام پر خریدا گیا تھا، والدہ نے اس وقت کہا تھا کہ اس مکان میں جس شخص نے جتنی رقم لگائی ہے، مکان فروخت ہونے کے وقت موجودہ قیمت کے حساب سے اس کی رقم نکال لی جائے گی۔
بعد ازاں 2005ء میں جب گھر کی مرمت کا موقع آیا تو اس وقت ایک بھائی رشید نے والدہ اور دوسرے شرکاء کی اجازت سے 367771 رقم لگائی تھی، پھر جب کچھ عرصے بعد والدہ کی کمیٹی کھلی اور پیسے آئے تو اس وقت والدہ نے اس بھائی (رشید) کو 230000 واپس کیے، یہ اسی مرمت کی مد میں جو پیسے لگائے تھے وہ واپس کیے، پھر جب رشید نے مرمت کی مد میں لگائی ہوئی رقم میں سے بقایا رقم 1,37,771 کا مطالبہ کیا تو اس وقت والدہ نے کہا کہ ابھی رہنے دیں، جب گھر بکے گا اس وقت وہ لے لینا۔
ہمارا سوال یہ ہے کہ مکان فروخت ہونے کے بعد رقم کس طرح شرعی اصول کے مطابق تقسیم کی جائے؟ کیا یہ طریقہ درست ہوگا کہ مکان کی موجودہ فروخت شدہ قیمت میں سے پہلے ان افراد کی رقم نکالی جائے جنہوں نے مکان خریدنے اور تعمیر کرنے میں رقم لگائی تھی، اور ان کی لگائی ہوئی رقم کو آج کے وقت مکان کی موجودہ مالیت کے تناسب سے شمار کیا جائے؟ّ نیز والدہ کے ذمے رشید کی جو 1,37,771 روپے کی بقایا رقم ہے، کیا وہ بھی پہلے ادا کی جائے گی؟ براہِ کرم مذکورہ صورتِ حال میں شرعی اصول کے مطابق مکان کی فروخت سے حاصل ہونے والی رقم کی تقسیم کا طریقہ واضح فرما دیں۔ جزاکم اللہ خیراً

جواب: پوچھی گئی صورت میں اگر واقعتاً 2002ء میں مکان خریدتے وقت والدہ اور تین بیٹوں کے درمیان اپنی رقم لگاتے ہوئے باقاعدہ شراکت طے ہوئی تھی تو ہر شخص اپنی لگائی ہوئی رقم کے تناسب سے مکان یا اس کی موجودہ قیمت کا مالک ہوگا، لہذا مکان فروخت ہونے پر اسی شراکتی تناسب سے شرکاء کے درمیان رقم تقسیم کی جائے گی۔
اسی طرح 2005ء میں تعمیر کے لیے رشید نے سب شرکاء کی اجازت سے جو 3,67,771 روپے اپنی طرف سے خرچ کیے اور والدہ نے بعد میں 2,30,000 روپے دیے، اور بقیہ رقم کے بارے میں والدہ نے واضح طور پر یہ تسلیم کیا تھا کہ 1,37,771 روپے رشید کے ہمارے ذمہ بطور قرض/قابلِ واپسی رقم باقی ہیں، مکان فروخت ہونے پر یہ رقم واپس کی جائے گی، لہذا مکان فروخت ہونے پر یہ رقم پہلے رشید کو ادا کی جائے گی، البتہ اسے موجودہ قیمت کے حساب سے بڑھا کر دینا لازم نہیں ہوگا، جتنی رقم واجب الادا تھی، اتنی ہی ادا کی جائے گی۔