عنوان: والد کے یہ کہنے "یہ گھر صرف بیٹوں کا ہے بیٹوں کا اس میں حصہ نہیں" کا حکم، نیز والدہ کا یہ کہنا کہ یہ گھر میری زندگی میں تقسیم نہیں ہوگا

سوال: ایک شخص کا انتقال ہوا اور اس کے ورثہ میں ایک بیوہ، تین بیٹے اور تین بیٹیاں ہیں، لیکن وراثت کے گھر میں سب سے بڑا بھائی رہائش پذیر ہے اور جب بھی اس سے وراثت کی تقسیم کی بات کی جائے تو ان کا کہنا یہ ہوتا ہے کہ والد صاحب نے اپنی زندگی میں ہی کہہ دیا تھا کہ یہ گھر صرف بھائیوں کا ہے بہنوں کا اس میں حصہ نہیں تو آیا بڑے بھائی کا اس طرح دعویٰ کرنا اور دیگر ورثہ کو محروم رکھنا درست ہے؟
اور والدہ ( یعنی متوفی کی بیوی) وہ بھی اس دعوے کی تائید کرتی ہے اور یہ کہتی ہیں کہ اگر گھر تقسیم کی کرنا ہے تو میری زندگی میں نہیں ہوگا، میرے بعد ہوگا، تو آیا اگر وراثت تقسیم کی جاتی ہے تو اس میں والدہ کی نافرمانی تو نہیں ہوگی؟

جواب: 1) واضح رہے کہ اگر مذکورہ مکان مرحوم والد کی ملکیت تھا اور انہوں نے اپنی زندگی میں شرعی طور پر بیٹوں کو ہبہ کرکے قبضہ نہیں دیا تھا تو ان کی وفات کے بعد اس مکان میں تمام شرعی ورثاء (مرحوم کی بیوہ، تینوں بیٹے اور تینوں بیٹیاں) اپنے شرعی حصوں کے تناسب سے حق دار ہیں، محض مرحوم والد کے یہ کہنے ’’یہ گھر صرف بیٹوں کا ہے، بیٹیوں کا اس میں حصہ نہیں‘‘ سے شرعاً بیٹیوں کا حقِ وراثت ختم نہیں ہوا ہے، لہٰذا بڑے بھائی کا اس بنیاد پر بہنوں اور دیگر ورثاء کو ان کے شرعی حصوں سے محروم رکھنا درست نہیں، لہٰذ ابڑے بھائی کو چاہیے کہ باہمی رضامندی سے مکان کی شرعی تقسیم کرے یا اس کی قیمت متعین کرکے ہر وارث کو اس کا شرعی حصہ دے دے۔
2) جہاں تک والدہ کی رضامندی یا ناراضی کا تعلق ہے، والدہ خود بھی مرحوم شوہر کی شرعی وارث ہیں اور ان کا بھی مرحوم شوہر کی میراث میں حصہ ہے، وہ اپنے حق کے بارے میں اپنی مرضی سے تصرف کرسکتی ہیں، لیکن وہ دوسرے ورثاء کے شرعی حصے ختم کرنے یا انہیں میراث سے محروم کرنے کی مجاز نہیں ہیں۔
لہٰذا اگر دیگر ورثاء اپنے شرعی حصے کا مطالبہ کریں تو محض والدہ کے اس کہنے کی وجہ سے کہ ’’میری زندگی میں گھر تقسیم نہیں ہوگا‘‘، ان کا شرعی حق ساقط نہیں ہوگا، نیز ورثاء کا اپنے حق کا مطالبہ کرنا والدہ کی نافرمانی شمار نہیں ہوگا، البتہ ممکن ہو تو باہمی رضامندی سے والدہ کے ساتھ ایسا طریقہ اختیار کرنا چاہیے جس میں ادب و احترام بھی برقرار رہے اور ان کی رہائش اور ضروریات بھی متاثر نہ ہوں۔