سوال: مفتی صاحب ! ایک آدمی نے لڑائی کے دوران اپنی بیوی کو کہا کہ تم فارغ ہو، پھر یہ کہا کہ فارغ ہے نکل جا، فارغ ہے، جا سکتی ہے، اعلان کر کے جا یا خاموشی سے جا، نوٹس بھیج دینا، میں دستخط کر دونگا۔
بیوی نے جب یہ کہا کہ آپ نے طلاق دینی ہے تو دے کر بھیج دو، میں نوٹس کیوں بھیجوں؟ میں نے کب طلاق مانگی ہے؟ تو شوہر نے کہا کہ میں نے طلاق نہیں دینی، تو جا کر نوٹس بھیج دے۔
اور جب بیوی نے کہا کہ آپ نے مجھے فارغ کردیا ہے تو شوہر نے قسم کھائی کہ میری نیت نہیں تھی، اور وہ جھوٹی قسم بہت کھاتے ہیں۔
مفتی صاحب ! معلوم یہ کرنا ہے کہ کتنی طلاقیں واقع ہو گئی ہیں؟

جواب: واضح رہے کہ شوہر اگر اپنی بیوی کو غصہ کی حالت میں یا مذاکرہ طلاق کی حالت میں "تو میری طرف سے فارغ ہے" کے الفاظ کہے، تو بغیر نیت کے بھی مذکورہ الفاظ سے ایک طلاقِ بائن واقع ہو جاتی ہے، البتہ اگر غصہ یا مذاکرہ طلاق نہ ہو، تو مذکورہ الفاظ کے ذریعے طلاق کی نیت سے ہی طلاق واقع ہوگی، چونکہ صورت مسئولہ میں مذکورہ الفاظ کہتے ہوئے شوہر کی طرف سے غصہ اور مذاکرہ طلاق پایا گیا ہے، اس لیے ان الفاظ سے ایک طلاق بائن بغیر نیت کے واقع ہوگئی ہے۔
اس کے بعد شوہر کو رجوع کرنے کا اختیار نہیں ہے، نیز چونکہ ایک طلاق بائن سے ہی نکاح ختم ہو جاتا ہے، اس لیے دوسری اور تیسری مرتبہ کہے گئے الفاظ لغو اور بے کار گئے، اور ان سے مزید کوئی طلاق واقع نہیں ہوئی۔
البتہ عدت میں یا عدت کے بعد طرفین کی رضامندی سے دوبارہ نکاح کرسکتے ہیں، لیکن اس نکاح کے بعد شوہر کو آئندہ صرف دو طلاقوں کا اختیار ہو گا، لہذا آئندہ اس بارے میں سخت احتیاط کی ضرورت ہے۔