سوال: محترم مفتی صاحب! آٹھ سال پہلے میرے شوہر نے جھگڑے کے دوران مجھے یہ کہا کہ "تم نے میرا کوئی کام کیا تو تمہیں طلاق ہے" پھر دو سیکنڈ کے بعد کہا کہ " تم نے آج میرا کوئی کام کیا تو تمہیں طلاق ہے"
میں اپنے شوہر کے ساتھ اکیلی رہتی ہوں، اس لیے سارے کام مجھے کرنے پڑتے ہیں، میں نے ان کا کام کردیا تھا، اس کے بعد میرے شوہر نے رجوع کرلیا تھا۔
اس جھگڑے کے تین سال بعد کسی مسئلہ کی وجہ سے اپنی امی کے گھر آگئی، امی کے گھر آنے کے پانچ مہینے بعد میرے شوہر نے مجھے میسیج کیا کہ "میں آپ کو طلاق دیتا ہوں" اس میسیج کے تقریباً ایک گھنٹہ بعد دوسرا میسیج کیا کہ "میں تمہیں دوسری طلاق دیتا ہوں"۔
اس کے علاوہ میرے شوہر لڑائی جھگڑے کے دوران گالی گلوج کرتے ہیں، اور نعوذباللہ اللہ اور رسول صلى الله عليه وسلم کو بھی گالی دیتے ہیں۔
اسی گالی دینے کی وجہ سے میرا ایک بار تجدیدِ نکاح بھی ہو چکا ہے، مگر میرے شوہر بار بار جھگڑے کے دوران نعوذباللہ اللہ تعالیٰ اور رسول اللہ صلى الله عليه وسلم کو گالی دیتے ہیں۔
کیا ایسا کرنے سے بار بار تجدیدِ نکاح کرنا پڑتا ہے؟
براہ مہربانی قرآن و سنت کی روشنی میں میرے مسئلہ کا حل فرمادیں۔

جواب: 1- سوال میں ذکر کردہ صورت اگر واقعتاً سچ ہے، تو چونکہ شوہر نے طلاق کو اس کے کام کرنے کے ساتھ مشروط کیا تھا، لہذا جب بیوی نے اپنے شوہر کا کوئی بھی کام کیا، تو اس پر ایک طلاق رجعی واقع ہوگئی، اس کے بعد اگر شوہر نے عدت کے دوران ہی رجوع کر لیا تھا، وہ عورت دوبارہ اس کے نکاح میں آگئی تھی، لیکن شوہر کے پاس اب دو طلاقوں کا اختیار تھا، اس کے بعد اگر شوہر ہی نے میسیج کے ذریعے دو طلاقیں دی تھیں، تو اس میسیج کے ذریعے بقیہ دو طلاقیں بھی واقع ہو گئیں اور وہ عورت اپنے شوہر پر حرمت مغلظہ کے ساتھ حرام ہو گئی۔
اس کے بعد اگر وہ خاتون دوبارہ اسی شخص کے ساتھ نکاح کرنا چاہے، تو وہ پہلے شوہر کی عدت گزار کر کسی اور مرد سے نکاح کرے اور اس سے ازدواجی تعلقات قائم کرے، پھر وہ اسے اپنی مرضی سے طلاق دیدے یا اس کا انتقال ہو جائے ، پھر وہ عورت عدت گزار کر پہلے شوہر سے نکاح کرے تو ایسا کرنا جائز ہے۔
2- غلطی سے اللہ ورسول کی شان میں گستاخی کرنا سخت گناہ ہے، لیکن نکاح نہیں ٹوٹتا، البتہ جان بوجھ کر اللہ ورسول کی شان میں گستاخی کرنے سے ایمان ونکاح کی تجدید کرنا ضروری ہے۔