سوال: قرب قیامت کی نشانیوں میں سے ایک نشانی یہ ہے کہ دجال کا ظہور ہوگا اور وہ دنیا میں آکر فساد پھیلائے گا، براہ کرم یہ بتا دیں کہ اس کا حلیہ کیسا ہوگا؟

جواب: حدیث شریف میں دجال کو اس امت کا سب بڑا فتنہ کہا گیا ہے۔ اسی وجہ سے جناب نبی کریم ﷺ نے وضاحت کے ساتھ امت کے سامنے اس کی نشانیاں بیان فرمائی ہیں تاکہ اس کے پہچاننے میں کسی قسم کی دشورای نہ ہو۔ اس بارے میں ذیل میں چند ایسی روایات ذکر کی جاتی ہیں جن میں دجال کا حلیہ بیان ہوا ہے:
١) حضرت عبداللہ بن عمر ؓ سے روایت ہے کہ رسول اللہ ﷺ نے فرمایا: ایک دفعہ میں سو رہا تھا کہ میں نے خود کو کعبہ کا طواف کرتے ہوئے دیکھا۔ اس دوران میں نے ایک گندمی رنگ کا آدمی دیکھا جس کے بال سیدھے تھے۔ وہ دو آدمیوں کے درمیان اس حالت میں تھا کہ اس کے سر سے پانی ٹپک رہا تھا۔ میں نے پوچھا: یہ کون ہے؟ انہوں نے کہا: یہ عیسیٰ ابن مریم ہیں۔ پھر میں جانے لگا تو اچانک ایک سرخ بھاری جسم والے شخص پر نظر پڑی، جس کے بال گھنگریالے تھے اور وہ دائیں آنکھ سے کانا تھا، گویا اس کی آنکھ ابھرے ہوئے انگور کی طرح تھی۔ میں نے پوچھا: یہ کون ہے؟ انہوں نے بتایا: یہ دجال ہے۔ اس کی شکل وصورت ابن قطن سے ملتی جلتی تھی۔ ابن قطن خزاعہ قبیلے سے بنو مصطلق کا ایک فرد تھا۔ (صحیح بخاری، حدیث نمبر: 7026)
٢) حضرت عبادہ بن صامت ؓ نے بیان کیا کہ رسول اللہ ﷺ نے فرمایا: "بلاشبہ میں نے تمہیں دجال کے متعلق (بہت کچھ) بتایا ہے۔ (اس کے باوجود) مجھے اندیشہ ہے کہ کہیں تم نے اسے نہ سمجھا ہو، (یاد رکھنا) مسیح دجال ٹھگنے قد والا، باہر کو نکلی ٹیڑھی پنڈلیوں والا اور بہت گھنگھریالے بالوں والا ہوگا، ایک آنکھ سے کانا ہوگا جو کہ مٹی ہوئی ہو گی، نہ تو ابھری ہوئی اور نہ گہری ہوگی، پھر بھی تمہیں کوئی شبہ ہو تو یاد رکھنا کہ تمہارا رب کانا نہیں ہے"۔ (سنن ابو داؤد، حدیث نمبر: 4320)
٣) حضرت انس بن مالک رضی اللہ تعالیٰ عنہ سے روایت ہے کہ رسول اللہ ﷺ نے فرمایا: "دجال بے نور آنکھ والا ہے، اور اس کی دونوں آنکھوں کے درمیان لکھا ہوا ہے "کافر"، پھر آپ ﷺ نے اس کے ہجّے کیے: "ک ف ر" اس کو ہر مسلمان پڑھ سکے گا"۔(صحیح مسلم، حدیث نمبر: 2933)
خلاصہ یہ کہ دجال کانا ہوگا، اس کے بال بد نما طریقے سے بہت زیادہ گھنگھریالے ہوں گے، دونوں آنکھوں کے درمیان "ک ف ر" لکھا ہوگا، رنگ سرخی مائل سفید ہوگا، قد کا چھوٹا ہوگا اور اس کا جسم بھاری ہوگا۔