سوال: مفتی صاحب! خلع سے متعلق شریعت میں کیا حکم ہے؟
نیز خلع کے بعد عدت کا کیا حکم ہے؟ اور عدت میں کس کس چیز کی پابندیاں ہوتی ہیں؟

جواب: واضح رہے کہ شریعت میں اصلاً طلاق کا اختیار صرف مرد کو دیا گیا ہے ، لیکن اگر زوجین میں نبھاؤ کی کوئی شکل نہ رہے اور شوہر بغیر عوض طلاق دینے پر آمادہ نہ ہو تو عورت کے لئے یہ راستہ تجویز کیا گیا ہے کہ وہ خلع کی پیش کش کرکے اپنے کو آزاد کرالے،  لہٰذا شرعاً خلع کے لئے میاں بیوی دونوں کا رضامند ہونا لازم ہے، بیوی کی رضامندی کے بغیر شوہر اس کو خلع لینے پر مجبور نہیں کرسکتا ہے، اور نہ شوہر کی رضامندی کے بغیر عورت خلع حاصل کرسکتی ہے.
اس تفصیل کے بعد آپ کے سوالات کے جوابات ذکر کیے جاتے ہیں:
1. خلع ایک ایسا معاملہ ہے، جو زوجین کی باہمی رضامندی پر موقوف ہے اور خلع مال کے ذریعے بھی ہوسکتا ہے اور بغیر مال کے بھی، خصوصاً اگر ظلم اور زیادتی شوہر کی طرف سے ہو تو اس خلع کے بدلے مال لینا مکروہ ہے۔
2. خلع کو شریعت میں طلاقِ بائن شمار کیا جاتا ہے اور عدت گزر جانے تک عورت کا نفقہ شوہر کے ذمہ لازم ہے، البتہ اگر عدت کا نفقہ اور رہائش کے خرچ کو ساقط کرنے کی صراحت کردی گئی ہو تو نفقہ اور رہائش کا خرچ ساقط ہوجائے گا۔
3. خلع کے بعد بھی عدت تین حیض ہیں اور خلع کی عدت باقی احکام میں طلاق بائن کی عدت کی طرح ہے۔
4. واضح رہے کہ عدت میں عورت پر درج ذیل پابندیاں عائد ہوتی ہیں، ان کا لحاظ رکھنا ضروری ہے: 
بلا ضرورتِ شدیدہ گھر سے نہ نکلے،  کسی طرح کا بناؤ سنگھار نہ کرے، کوئی زیور نہ پہنے، خواہ سونے چاندی کا ہو یا کسی اور دھات کا، بدن یا کپڑوں میں کوئی خوشبو نہ لگائے، کوئی بھی تیل بدن پر بلا عذر نہ لگائے، اگرچہ وہ خوشبو دار نہ ہو، سرمہ یا کاجل نہ لگائے، مہندی نہ لگائے، شوخ رنگ کے کپڑے نہ پہنے، پردے کے حوالے سے عدت میں بھی وہی احکام ہیں جو عام ایام میں ہیں۔
عورت پر عدت کے دوران اس کے علاوہ بہت سی چیزوں کی پابندی کے حوالے سے جو بے اصل باتیں ہمارے معاشرے میں مشہور ہیں، ان کی شریعت میں کوئی حقیقت نہیں ہے۔