سوال: محترم مفتی صاحب!
آج کل شادی شدہ مرد حضرات بیرون ملک نوکری کے لئے اکیلے جاتے ہیں اور سالہاسال اپنے ملک واپس نہیں آتے (چاہے تنگدستی کی وجہ سے یا کوئی بھی دوسری وجہ ہو)۔
سوال یہ ہے کہ ایسی صورت میں اگر بیوی کسی گناہ کے کام میں مبتلا ہو جائے تو کیا
اس گناہ کا خاوند بھی ذمہ دار اور سزا وار ہے؟ کیا ایسی صورت میں بیوی کا طلاق لینا مناسب ہے؟

جواب: عام حالات میں شوہر کیلئے بیوی کے اجازت کے بغیر چار ماہ تک٬ اور بیوی کی اجازت ہو تو، چار ماہ سے زائد عرصہ دور رہنا جائز ہے.
یہ حکم عام حالات اور کبھی کبھار ضرورت پیش آنے کی صورت کا ہے، لیکن اگر اتنا عرصہ دور رہنے کی صورت میں میاں بیوی میں سے کسی ایک کے بھی فتنے میں مبتلا ہونے کا یقین یا غالب گمان ہو، تو پھر بیوی کی اجازت کے ساتھ بھی دور رہنا جائز نہ ہو گا، اور جہاں غالب گمان تو نہ ہو، مگر کسی درجے میں احتمال ہو، تو وہاں بھی حتی الامکان اس سے احتراز ہی لازم ہے، اور اس سلسلے میں مدت کی کوئی قید نہیں ہے، بلکہ یہ مدت عرف اور حالات کے لحاظ سے بدلتی رہے گی، جبکہ موجودہ حالات میں ملازمت، کمائی وغیرہ کے سلسلے سالہا سال بیوی سے دور رہنا فتنے سے خالی نہیں ہے، اور اتنی مدت کیلئے بیوی کو چھوڑ کر جانا کہ اس کے فتنے میں واقع ہونے غالب گمان ہو، یا دیگر حقوق ضایع ہورہے ہوں، ہر گز جائز نہیں، نیز ایسی صورت میں اگر ناگزیر حالات کی بناء پر بیوی طلاق کا مطالبہ کرے، تو ان شاء اللہ، اللہ کے ہاں وہ گنہگار نہیں ہوگی۔
لہذا گھر سے دور رہائش پذیر افراد کو اولا تو ایسی ملازمت و کاروبار تلاش کرنا چاہئے کہ چار ماہ سے پہلے گھر چکر لگانا ممکن ہو٬ البتہ اگر کوئی ایسی صورت ممکن نہ ہو٬ اور گھر سے بہت زیادہ دور جانا پڑجائے٬ جہاں سے سال دو سال تک واپسی مشکل ہو٬ تو ایسی صورت میں درج ذیل شرائط کے ساتھ وہاں ٹھہرنا جائز ہوگا:
1 .اس مدت میں بیوی کو حقوق زوجیت (جماع وغیرہ ) کی طرف زیادہ شوق و رغبت نہ ہو۔
2. اتنے عرصے میں بیوی یا خود شوہر کے فتنے میں پڑنے یقین یا غالب گمان نہ ہو۔
3. بیوی کی اجازت ہو۔
4. نان و نفقہ اور اولاد کی تعلیم اور تربیت کا مناسب انتظام کیا جائے۔