سوال: مفتی صاحب ! اس حدیث کی تصدیق اور اس سے متعلق رہنمائی فرمادیں۔ حضرت عبدالرحمن بن عوف رضی اللہ عنہ فرماتے ہیں کہ میں نے رسول اللہ صلی اللہ علیہ وسلم کو فرماتے سنا: جب کوئی شخص شک کرے کہ دو رکعت پڑھی ہے یا ایک؟ تو ایک کو اختیار کرے، اور جب دو یا تین میں شک کرے تو دو کو اختیار کرے، اور جب تین یا چار میں شک کرے تو تین کو اختیار کرے، پھر باقی نماز پوری کرے، تاکہ وہم زیادتی میں ہو، کمی میں نہ ہو، پھر سلام پھیرنے سے پہلے بیٹھے بیٹھے دو سجدے کرے۔ (سنن ابن ماجہ، حدیث 1209)

جواب: سوال میں پوچھی گئی حديث كو امام ابن ماجہ رحمہ اللہ (م 273 ھ) نے اپنى مشہور کتاب "سنن ابن ماجہ" میں "محمد بن إسحاق ، عن مکحول ، عن کریب رحمہم اللہ "کى سند سے نقل فرمائى ہے اور اسى سند سے امام ترمذى رحمہ اللہ (م 279 ھ) نے اپنى مشہور کتاب "سنن الترمذی" میں بھى اس حدیث کو نقل فرمایا ہے اور اس حدیث کو "حسن صحیح" قرار دیا ہے۔ (1)
حدیث کا ترجمہ وتشریح درج ذیل ہے:
ترجمہ: سیدنا حضرت عبدالرحمن بن عوف ؓ سے روایت ہے، انہوں نے فرمایا: میں نے رسول اللہ ﷺ سے سنا، آپ فرما رہے تھے: ’’جب تم میں سے کسی کو (نماز کے دوران) دو اور ایک (رکعت) کے درمیان شک ہو جائے، تو وہ ایک رکعت شمار کرے اور (اگر) دو اور تین کے درمیان شک ہو، تو دو رکعتیں شمار کر لے۔ اگر تین اور چار کے درمیان شک پڑ جائے، تو تین رکعتیں سمجھ لے۔ پھر باقی نماز پوری کر لے، حتی کہ شک زیادتی کے بارے میں رہ جائے۔ پھر سلام پھیرنے سے پہلے بیٹھے بیٹھے دو سجدے کر لے‘‘۔(سنن ابن ماجہ: حدیث نمبر: 1209)
تشريح: اس حديث میں یہ بیان کیا گیا ہے کہ اگر کوئى شخص نماز پڑھتے ہوئے رکعات کى تعداد بھول جائے ،تو ایسى صورت میں اسے کیا کرنا چاہیے، اس بارے میں جو ہدایات دى گئى ہیں اس کى تفصیل فقہاء کرام کے بیان کے مطابق حسب ذیل ہے:
رکعات کی تعداد میں بھول جانے یا شک کی صورت میں شرعی حکم یہ ہے کہ اگر یہ بھولنا پہلی مرتبہ ہوا ہے تو دوبارہ نئے سرے سے نماز پڑھے۔ اگر یہ شک (بھولنا) بار بار ہوتا ہے، تو پھر غالب گمان پر عمل کرنا چاہیے، یعنی جتنی رکعتیں غالب گمان سے یاد ہوں، اسی قدر رکعتیں سمجھے کہ پڑھ چکا ہے، اور اگر غالب گمان بھی کسی جانب نہ ہو، تو اس صورت میں کمی کی جانب کو اختیار کرے، مثلاً: ظہر کی نماز میں شک ہوا کہ تین رکعات پڑھی ہیں یا چار، اگر غالب گمان کسی طرف نہ ہو، تو تین رکعتیں شمار کرکے چوتھی رکعت پڑھے، اسی طرح دو یا ایک رکعت میں شک ہوجائے اور کسی طرف غالب گمان نہ ہو تو اس کو ایک شمارکرے اور بقیہ رکعتیں پڑھ کر نماز مکمل کرے اور آخر میں احتیاطاً سجدہ سہو بھی کرلے۔ (2)