سوال: اگر کوئی شخص نمازِ ظہر کی جماعت میں شریک ہوجائے، پھر اسے یاد آئے کہ اس نے فجر کی قضا نماز نہیں پڑھی ہے، تو ایسے شخص کے لئے کیا حکم ہے، آیا نماز توڑ کر قضا پہلے پڑھے یا کیا کرے؟

جواب: اگر کوئی شخص صاحبِ ترتیب (جس کے ذمہ چھ سے کم نمازیں قضا ہوں) ہو، اور وہ جماعت میں شریک ہوجائے، پھر اسے یاد آئے کہ اس نے قضا نماز نہیں پڑھی ہے، تو ایسے شخص کے لئے حکم یہ ہے کہ وہ جماعت کے ساتھ شروع کی گئی نماز کو پورا کرے، پھر سلام پھیرنے کے بعد پہلے قضا نماز پڑھے، پھر جماعت کے ساتھ پڑھی گئی نماز کو دوبارہ پڑھے، اور اگر مذکورہ شخص صاحبِ ترتیب نہ ہو، تو امام کے ساتھ پڑھی گئی نماز ادا ہوجائے گی، قضا نماز پڑھ کر امام کے ساتھ پڑھی گئی نماز کو دوبارہ پڑھنا واجب نہیں ہے۔