عنوان: مسجد سے متصل احاطہ (پارکنگ) میں امامت اور اقتداء کا حکم

سوال: بسم اللہ الرحمٰن الرحیم
السلام علیکم ورحمۃ اللہ وبرکاتہ محترم مفتی صاحب!
اللہ تعالیٰ سے دعا ہے کہ آپ حضرات خیر و عافیت سے ہوں اور دینِ اسلام کی خدمت میں آپ کی مساعی کو شرفِ قبولیت عطا فرمائے۔
بعد از سلام، مؤدبانہ گزارش ہے کہ ایک شرعی مسئلے میں آپ کی رہنمائی اور فتویٰ مطلوب ہے۔ عرض یہ ہے کہ ہمارا تعلق ایبٹ آباد سے ہے۔ الحمد للہ! اللہ تعالیٰ کے فضل و کرم سے ہمارے مرکز میں ایک دعوتی و تبلیغی اجتماع منعقد ہو رہا ہے۔ اجتماع کی تمام سرگرمیاں مرکز ہی میں ہوں گی۔ مرکز میں جگہ اگرچہ موجود ہے، لیکن شرکاء کی کثرت کے پیشِ نظر اندیشہ ہے کہ مسجد کے اندر تمام حاضرین نماز میں شریک نہ ہو سکیں گے۔
اسی ضرورت کے پیشِ نظر یہ تجویز دی گئی ہے کہ نماز کی امامت مسجد کے ساتھ متصل مرکز کی پارکنگ میں کرائی جائے۔ یہ پارکنگ تین منزلہ ہے اور مسجد سے ملی ہوئی ہے۔ امام صاحب پارکنگ کے حصے میں کھڑے ہوں، جبکہ مقتدیوں کی صفیں پارکنگ میں بھی ہوں اور مسجد کے اندر بھی، یعنی کچھ مقتدی امام کے پیچھے پارکنگ میں ہوں اور کچھ مسجد کے اندر نماز ادا کریں۔
اب دریافت طلب مسئلہ یہ ہے کہ: کیا ایسی صورت میں، جبکہ امام مسجد کے بجائے مسجد سے متصل پارکنگ میں کھڑا ہو اور مقتدیوں کی بعض صفیں مسجد کے اندر اور بعض باہر ہوں، سب کی اقتدا اور نماز شرعاً درست ہوگی؟ کیا اس سے مسجد کے اندر نماز ادا کرنے والوں کی نماز یا اقتدا پر کوئی اثر پڑے گا؟
واضح رہے کہ اس تجویز کا مقصد صرف یہ ہے کہ شرکاء کی کثرت کی وجہ سے کوئی شخص جماعت کی نماز سے محروم نہ رہے، اور تمام حاضرین باجماعت نماز ادا کر سکیں۔ قرآن و سنت، فقہِ حنفی اور اکابر فقہاء کی تصریحات کی روشنی میں اس مسئلے کی وضاحت اور رہنمائی فرما دیں تاکہ ہم شرعی حکم کے مطابق عمل کر سکیں۔
اللہ تعالیٰ آپ حضرات کو جزائے خیر عطا فرمائے۔ فقط والسلام

جواب: پوچھی گئی صورت میں چونکہ اجتماع کی وجہ سے نمازیوں کی تعداد زیادہ ہے اور مسجد میں جگہ ناکافی ہونے کا قوی اندیشہ ہے، اس لیے فقہِ حنفی کے مطابق اس ضرورت کے پیشِ نظر امام کا مسجد سے متصل پارکنگ میں کھڑے ہو کر امامت کرانا بلا کراہت جائز ہے، بشرطیکہ چند بنیادی شرائط کی رعایت کی جائے:
(1) کوئی مقتدی امام سے آگے یعنی قبلہ کی جانب زیادہ قریب نہ کھڑا ہو، کیونکہ مقتدی کا امام سے آگے ہونا اس کی نماز کے فساد کا سبب بنتا ہے۔
(2) مسجد اور پارکنگ کے درمیان صفوں کا اتصال برقرار رہے، یعنی درمیان میں دو صفوں کے برابر یا اس سے زیادہ خالی جگہ یا ایسی عام شاہراہ نہ ہو جس پر آمد و رفت ہوتی ہو، جبکہ آپ کی بیان کردہ صورت میں پارکنگ مسجد سے متصل ہے، اس لیے صفیں ملا کر کھڑے ہونے سے یہ شرط پوری ہو جائے گی۔
(3) تمام مقتدیوں تک امام کے انتقالات کا علم پہنچتا رہے، خواہ امام کی آواز براہِ راست یا لاؤڈ اسپیکر کے ذریعے پہنچ رہی ہو یا امام یا اگلی صفوں کی حرکات نظر آ رہی ہوں، تاکہ صحیح طور پر اقتدا ممکن ہو۔
مذکورہ شرائط کی مکمل رعایت کے ساتھ بضرورت امام کا مسجد سے متصل پارکنگ میں کھڑے ہو کر جماعت کرانا جائز ہے اور مسجد کے اندر، پارکنگ میں، نیز اس کی مختلف منزلوں پر موجود تمام مقتدیوں کی نماز شرعاً درست ہوگی۔