سوال: خلع کی عدت کتنی ہے؟ نیز کیا عدت پوری ہونے پر دوبارہ اسی مرد سے شادی ہو سکتی ہے؟

جواب: (1) اگر عورت حاملہ نہ ہو، تو خلع کے بعد عدت تین حیض ہیں، اور اگر حاملہ ہو، تو عدت وضع حمل ہوگی۔
(2) اگر خلع نامہ میں تین طلاق کا ذکر نہ ہو تو اس صورت میں اس خلع سے چوں کہ ایک طلاقِ بائن واقع ہوئی ہے، اس لیے دونوں کو دوبارہ ساتھ رہنے کے لیے دو مرد یا ایک مرد اور دو عورتوں کی موجودگی میں نئے مہر کے ساتھ تجدیدِ نکاح کرنا پڑے گا۔
لیکن اگر خلع نامہ میں تین طلاق کا ذکر ہو تو پھر عورت شوہر پر حرمتِ مغلظہ کے ساتھ حرام ہوگی، البتہ اگر عورت سابقہ شوہر کی عدت پوری کرکے دوسری جگہ نکاح کرلے، دوسرے شوہر کا حقوقِ زوجیت ادا کرنے کے بعد انتقال ہوجائے یا وہ حقوقِ زوجیت ادا کرکے خود ہی اسے طلاق دے دے اور اس کی عدت بھی گزر جائے، تو مذکورہ عورت کے لیے سابقہ شوہر سے نئے مہر کے ساتھ دو گواہوں کی موجودگی میں نکاح کرنا درست ہوگا۔