سوال: رہنمائی فرمائیے گا کہ ہم یہ سنتے ہوئے آئے ہیں کہ گھر میں رات کو کھانے پینے کے برتن کھلے نہیں ہونے چاہیں اور خالی گلاس کو بھی کھلا ہوا نہیں ہونا چاہیے، کیا یہ بات حدیث سے بات ثابت ہے؟
مثال کے طور پر مالش کرنے کے لیے تیل تھا، وہ کھلا رہ گیا تو کیا اس کو استعمال کرنا چاہیے، اگر استعمال نہیں کرنا چاہیے تو پھر اس کے ساتھ کیا کرنا چاہیے؟

جواب: رات کو برتن ڈھانکنے کاحکم کئی روایات میں ذکر کیا گیا ہے۔
عَنْ جَابِرٍ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ : أَطْفِئُوا الْمَصَابِيحَ إِذَا رَقَدْتُمْ، وَغَلِّقُوا الْأَبْوَابَ، وَأَوْكُوا الْأَسْقِيَةَ، وَخَمِّرُوا الطَّعَامَ وَالشَّرَابَ. وَأَحْسِبُهُ قَالَ : وَلَوْ بِعُودٍ تَعْرُضُهُ عَلَيْهِ۔
(صحیح البخاری،کتاب الاشربة، باب تغطیة الاناء، رقم الحدیث : ۵٦٢۴)
ترجمہ: حضرت جابر رضی اللہ عنہ سے روایت ہے کہ رسول اللہﷺنے فرمایا: جب تم رات کو سونے لگو تو چراغ بجھادو، دروازے بند کردو، برتنوں کو ڈھانک دو اور کھانے پینے کی چیزوں پر اوپر سے کپڑا ڈال کر محفوظ کردو۔
حضرت جابر رضی اللہ عنہ فرماتے ہیں: مجھے یوں یاد پڑتا ہے کہ آپ نے یہ بھی فرمایا کہ اگرچہ برتن کی چوڑائی پر کوئی لکڑی کا ٹکڑا ہی رکھ دو۔
واضح رہے کہ اس حدیث میں جو احکام دئیے گئے ہیں، وہ وجوب کے لیے نہیں ہیں، بلکہ آپ صلی اللہ علیہ وسلم نے ہماری روز مرہ زندگی میں بھلائی و بہتری کے لیے بطور شفقت یہ احکام ارشاد فرمائے ہیں۔
علامہ نووی رحمہ اللہ نے لکھا ہے کہ اس حکم پر عمل کرنے میں کئی فائدے ہیں، دو تو خود احادیث مبارکہ میں ذکر کئے گئے ہیں۔
پہلا فائدہ یہ ہے کہ شیطان سے حفاظت، کیونکہ شیطان ڈھکے ہوئے برتن کو کھول نہیں سکتا۔
دوسرا فائدہ یہ ہے کہ سال کی ایک رات میں نازل ہونے والی وباء سے حفاظت ہوجاتی ہے۔
تیسرا فائدہ یہ ہے کہ نجاست اور گندگی سے حفاظت ہوجاتی ہے۔
چوتھا فائدہ یہ ہے کہ حشرات اور کیڑے مکوڑوں سے حفاظت ہوجاتی ہے، کیونکہ بسا اوقات کیڑے مکوڑے برتن میں گرجاتے ہیں، اور آدمی بے خبری میں کھا پی لیتا ہے اور اس کو نقصان پہنچ جاتا ہے۔

ان عظیم الشان فوائد اور بھلائیوں کو مدنظر رکھتے ہوئے آپ صلی اللہ علیہ وسلم نے اپنی امت کو یہ احکام دئیے ہیں اور ظاہر ہے کہ یہ احکام "استحبابی" درجے کے ہیں۔
اور اس س ساری تفصیل سے یہ بھی واضح ہو گیا کہ برتنوں کو نہ ڈھکنے کی وجہ سے وہ چیزیں جو اس کے اندر ہیں، حرام نہیں ہوتی، اس لیے اگر کوئی ان اشیاء کو استعمال کرنا چاہے تو استعمال کرسکتا ہے۔