سوال: علامہ عینی نے شرح بخاری میں ایک حدیث نقل کی ہے کہ جو شخص ایک مرتبہ مندرجہ ذیل دعا پڑھے، اس کے بعد یہ دعا کرے کہ اس کا ثواب میرے والدین کو پہنچادے تو اس نے والدین کا حق ادا کردیا۔الْحَمْدُ لِله رَبِّ السَّمَاوَاتِ وَالأَرْضِ رَبِّ الْعَالَمِينَ، وَلَهُ الْكِبْرِيَاءُ فِي السَّمَاوَاتِ وَالأَرْضِ وَهُوَ الْعَزِيزُ الْحَكِيمُ، لِله الْحَمْدُ رَبِّ السَّمَاوَاتِ وَالأَرْضِ رَبِّ الْعَالَمِينَ، وَلَهُ الْعَظَمَةُ فِي السَّمَاوَاتِ وَالأَرْضِ وَهُوَ الْعَزِيزُ الْحَكِيمُ، لِله الْمُلْكُ رَبِّ السَّمَاوَاتِ وَرَبِّ الأَرْضِ وَرَبِّ الْعَالَمِينَ، وَلَهُ النُّورُ فِي السَّمَاوَاتِ وَالأَرْضِ وَهُوَ الْعَزِيزُ الْحَكِيمُ۔
کیا یہ دعا اس فضیلت کے ساتھ درست اور ثابت ہے؟ براہ کرم اس کی تصدیق فرمادیں۔

جواب: مرحوم والدین کے لئے دعا ، استغفار اور ایصال ثواب کرنا متعدد روایات سے ثابت اور باعث ِ فضیلت ہے، البتہ والدین کے حقوق کی ادائیگی کے عنوان سے دریافت کردہ مشہور روایت جس کو حضرت انس رضی اللہ عنہ کے طریق سے مختلف کتب میں نقل کیا جاتا ہے، اس روایت کی سند میں "بشر بن الحسین" نامی راوی ہے، جس پر ائمہ جرح وتعدیل نے شدید جرح کی ہے، لہذا مذکورہ روایت اور اس میں موجود دعا سند کے اعتبار سے انتہائی ضعیف اور منکر ہے،اس کو آگے بیان کرنا درست نہیں۔
ذیل میں اس روایت اور دعا کا ترجمہ نقل کیا جاتا ہے:
"جس شخص نے ان کلمات کو ایک بار پڑھا، اور اس کا ثواب اپنے مرحوم و الدین کو بخشا، سو اس نے اپنے والدین کی زندگی بھر کا حق ادا کردیا، وہ کلمات یہ ہیں "الحمد لله رب السموات والأرض رب العالمين، وله الكبرياء في السموات والأرض وهو العزيز الحكيم، لله الحمد رب السموات والأرض رب العالمين، وله العظمة في السموات والأرض وهو العزيز الحكيم، لله الملك رب السموات ورب الأرض ورب العالمين، وله النور في السموات والأرض وهو العزيز الحكيم" (تمام تعریفوں کے لائق اللہ رب العزت کی ذات ہے، جو آسمان ور زمین ، اور تمام کائنات کا پالنہار ہے، آسمان و زمین میں اسی کے واسطے بڑائی ہے، وہی ذات غالب اور حکمت والی ہے۔ اللہ رب العزت ہی کے لیے تمام حمد وثناء ہیں، جو آسمان و زمین اور کُل کائنات کا رب ہے، اسی کے لیے آسمان وزمین میں عظمت و کبریائی ہے، وہی عزیز وحکیم ذات ہے، اللہ پاک ہی کے لئے باشاہت ہے، جو آسمان وزمین اور ساری سائنات کی پرورش کرنے والا ہے، اسی کے واسطے آسمان وزمین پُر نور ہے، وہی غالب اور حکمت والا ہے)۔
روایت سے متعلق تفصیل وتخریج:
مذکورہ روایت کو محدث ابن شاہین (متوفی:385ھ) نے "الترغیب فی فضائل الاعمال " میں، اور ان کے حوالہ سے علامہ منیجی (متوفی:686ھ) نے "اللباب فی الجمع بین السنة والکتاب"اور علامہ بدر الدین عینی (متوفی:855ھ)نے "عمدة القاری" میں ، جبکہ علامہ عبدالرحمن صفوری (متوفی:894ھ) رحمہم اللہ نے اپنی کتاب نزھة المجالس" میں کتاب "تحفة الحبیب " سے روایت کو نقل کیا ہے۔ البتہ اس روایت کی سند میں راوی "بشر بن حسین" نامی پر ائمہ جرح وتعدیل نے سخت جرح کی ہے، جس کی وجہ سے علامہ سیوطی اور نور الدین ابن عراق الکنانی رحمہم اللہ نے موضوع ومن گھڑت روایات کی نشاندہی کی غرض سے تألیف کردہ اپنی کتب میں اس روایت کو ذکر کیا ہے، اور آخر الذکر نور الدین ابن عراق رحمہ اللہ نے روایت میں موجود علت(راوی بشر بن حسین پر شدید جرح) پر بھی تنبیہ کی ہے۔
راوی" بشر بن حسین " ائمہ جرح وتعدیل کی نگاہ میں:
ذکر کردہ راوی کو بعض نے "ضعیف "، بعض نے "متروک" لکھا ہے، علامہ ابو حاتم ، ابن عراق کنانی اور ہیثمی رحمہم اللہ نے "کذاب "قرار دیا ہے، جبکہ ابن عدی رحمہ اللہ نے اس کی روایات کو "لیس بمحفوظ" لکھا ہے۔ (ملاحظہ ہو :"لسان المیزان، 292/2، الناشر: دار البشائر الإسلامية)