سوال: والد صاحب فوت ہوگئے ہیں، ورثاء میں ایک بیوہ، پانچ بیٹے اور چار بیٹیاں ہیں، (7800000) اٹہتر لاکھ کی پراپرٹی فروخت کی ہے، کس کو کتنا حصہ ملے گا؟
واضح رہے کہ بیٹیاں ساری شادی شدہ ہیں اور جو پراپرٹی سیل کی ہے، اس میں سارے بھائی رہا کرتے تھے، جس میں بھائیوں نے بجلی کا بل دو لاکھ چڑھا دیا تھا، یہ بل کے پیسے صرف بھائیوں کے حصے میں سے کاٹے جائیں گے یا بہنوں کے حصے میں سے بھی بل کی رقم کٹے گی؟

جواب: صورت مسئولہ میں کل ترکہ کو سولہ (16) حصوں میں تقسیم کیا جائے گا، جس میں سے بیوہ کو دو (2)، ہر بیٹے کو بھی دو (2) ، اور ہر بیٹی کو ایک(1) حصہ ملے گا۔
اس حساب سے بیوہ کو نو لاکھ پچھتر ہزار روپے(975000)، ہر بیٹے کو بھی نو لاکھ پچھتر ہزار روپے(975000)، اور ہر بیٹی کو چار لاکھ ستاسی ہزار پانچ سو روپے (487500) ملیں گے۔
اور چونکہ گھروں میں بھائی رہائش پذیر تھے، اور انہوں نے ہی بجلی استعمال کی ہے ، اس لئے اس کے بل بھی انہی کے ذمہ واجب الادا ہیں ، میت کے ذمہ نہیں ، لہذا بجلی کے بل کل ترکہ میں سے ادا نہیں کئے جائیں گے ۔