سوال: السلام علیکم، مفتی صاحب! میرا بھائی شال (Shawl) کی دوکان میں نوکری کر رہا ہے اور اس کے ساتھ ساتھ وہ فیس بک پر اپنا پیج چلا رہا ہے، اس نے کچھ شال کی تصاویر لے کر فیس بک پر ڈال دی ہیں، جب وہ فیس بک پر آرڈر لے کر وہ شال ڈاک کے ذریعے بھیجتا ہے، تو کسٹمر اس کے اکاؤنٹ میں روپیہ بھیج دیتا ہے تو میرا بھائی شال کی قیمت دوکان کے مالک کے اکاؤنٹ میں بھیج کر زائد منافع اپنے پاس رکھ لیتا ہے، جبکہ دوکان کے مالک کو اس کے بارے میں کچھ نہیں بتاتا۔ تو کیا یہ روپیہ (جو وہ اپنے اکاؤنٹ میں دوکان مالک کو بتاتے بغیر رکھتا ہے) حلال ہوگا یا نہیں؟

جواب: مذکورہ صورت میں آپ کا بھائی چونکہ دوکان میں ملازم ہے٬ اور وہ اپنے مالک (دوکاندار) کی ہی شالیں آگے فروخت کرتا ہے٬ اس لئے اس پر حاصل ہونے والا سارا نفع دوکاندار کا حق ہے٬ اس کی اجازت کے بغیر زائد نفع اپنے پاس رکھنا خیانت اور ناحق طریقے سے مال کھانا ہے٬ جو کہ شرعا جائز نہیں٬ اس سے بچنا لازم ہے.
البتہ اگر دکاندار خود اسے زائد نفع بطور کمیشن یا ہدیہ کے دینا چاہے٬ تو پھر لے سکتا ہے۔
نیز اس کی دوسری جائز صورت یہ ہے کہ وہ اپنے دوکاندار سے شال کی قیمت وغیرہ طے کرکے باقاعدہ اس سے خرید کر اپنے قبضہ میں لے لے٬ پھر اس میں اپنا نفع رکھ کر آگے اپنے گاہک کو بیچ سکتا ہے٬ بشرطیکہ یہ کام ملازمت کے اوقات میں نہ کیا جائے٬ اگر ملازمت کے اوقات میں کرنا ہو٬ تو اس کیلئے مالک کی اجازت ضروری ہوگی٬ اس کی اجازت کے بغیر ملازمت کے اوقات میں یہ کام کرنا شرعا درست نہیں ہوگا۔