سوال:
سنا ہے کہ جب امام نماز میں بھولتا ہے تو اس کی وجہ کسی مقتدی کا بے وضو ہونا ہوتا ہے۔ کیا یہ بات کسی حدیث پاک سے ثابت ہے؟
جواب: یہ بات صحیح حدیث سے ثابت ہے كہ مقتدیوں کے اچھی طرح وضو نہ کرنے کا اثر امام پر ہوتا ہے۔
مسند احمد میں روایت ہے:
ترجمہ:جناب رسول اللہ ﷺ نے ایک مرتبہ نماز صبح ادا کی، اس میں آپ نے سورہ روم کی تلاوت شروع کی تو اختلاط و نسیان واقع ہونے لگا، نماز سے فراغت کے بعد رسول اللہ صلی اللہ علیہ وسلم نے فرمایا:’’مجھے دوران نماز تلاوت قرآن میں اختلاط ونسیان ہو رہا تھا جس کی وجہ یہ تھی کہ کچھ لوگ ہمارے ساتھ نمازادا کرتے ہیں، لیکن وہ اچھی طرح وضو نہیں کرتے خبردار !جو شخص ہمارے ساتھ نماز ادا کرے اسے چاہیے کہ وہ اچھی طرح وضو کرے‘‘۔(مسند احمد،حدیث نمبر 15874، ط: مؤسسة الرسالة)
تخریج الحدیث:
۱۔اس روایت کو امام احمد بن حنبل (م241 ھ)نے ’’مسند احمد ‘‘(25 /208)،رقم الحديث:15872،23072،23125 ،ط: مؤسسة الرسالة) میں ذکر کیا ۔
۲۔امام نسائی (م 303ھ) نے ’’سنن نسائی‘‘(2/ 156)،رقم الحدیث: 947،ط: مكتب المطبوعات الإسلامية) اور ’’السنن الکبری ‘‘(1/488)،رقم الحديث: 1021،ط:مؤسسة الرسالة)میں ذکر کیا ۔
۳۔امام طبرانی (م 360ھ)نے ’’المعجم الکبیر‘‘(1/301)رقم الحدیث : 881،ط: مكتبة ابن تيمية) میں ذکر کیا ۔
۴۔امام ابن ابی شیبہ(م235ھ) نے’’مصنف ابن ابی شیبہ‘‘(1/240)رقم الحدیث:34 ،ط:دارالقبلة ) میں ذکر کیا ۔
5۔امام عبدالرزاق بن ہمام(م 211ھ) نے ’’مصنف عبدالرزاق‘‘(2/203)رقم الحدیث: 2750 ،ط:دارالتاصيل ) میں ذکر کیا ۔
مذکورہ روایت کی اسنادی حیثیت:
علامہ ہیثمی (م 807ھ)نے اس روایت کے بارے میں فرمایا:اس کے رجال صحیح کے رجال ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔
دلائل:
مسندأحمد: (رقم الحديث: 15874، 208/25، ط: مؤسسة الرسالة)
حدثنا عبد الملك بن عمير، قال: سمعت شبيبا أبا روح، من ذي الكلاع،، أنه صلى مع النبي صلى الله عليه وسلم الصبح فقرأ بالروم، فتردد في آية فلما انصرف قال: " إنه يلبس علينا القرآن أن أقواما منكم يصلون معنا لا يحسنون الوضوء، فمن شهد الصلاة معنا فليحسن الوضوء ۔
أخرجه أحمدفي ’’مسنده‘‘(25 /208)،(15872)( 23072)(23125) و النسائي في ’’سننه ‘‘(2/ 156)،(947)، ’’السنن الكبري‘‘(1/488)(1021) والطبراني في’’معجمه الكبير‘‘(1/301)(881) و ابن أبي شيبة’’مصنفه‘‘(1/240)( 34 ) و عبدالرزاق في ’’مصنفه‘‘(2/203)( 2750)
تفسير ابن كثير: (289/7، ط: مؤسسة قرطبة)
فدل هذا على أن إكمال الطهارة يسهل القيام في العبادة ويعين على إتمامها وإكمالها والقيام بمشروعاتها۔
مجمع الزوائد للهيثمي: (261/1، ط: مكتبة القدسي)
رواه أحمد، ورجاله رجال الصحيح.
واللہ تعالٰی اعلم بالصواب
دارالافتاء الاخلاص،کراچی